aap aisa kyon karna chaheinge: aap apne doston ko dikhana chahte hain ki aap apni marzee ke maalik hain. aap sochte hain ki aap apne mammi-paapa se behtar jaante hain ya aapko unke faislon ki kadar nahin hai.—neetivachan 14:18.

anjam: ho sakta hai, aap apne doston ke beech chhaa jaayen, lekin woh yah bhi jaan jaayenge ki aap bahot chaalak hain. agar aap apne mammi-paapa ko dhokha de sakte hain, to shaayad aap apne doston ko bhi dhokha de sakte hain. aur jab aapke mammi-paapa ko pata chalega ki aapne kya kiya hai, to unhein bahot dukh hoga ki aapne unka vishvas toda hai aur fir shaayad woh aapko pehle jaisi aazadi na dein!—neetivachan 12:15.

aap aisa kyon karna chaheinge: aap vahaan jaane ke baare mein sochte hain aur faisla karte hain ki aap vahaan nahin jaayenge, kyonki vahaan jo hoga woh aapke star ke mutabik nahin hoga ya jo log vahaan aayenge, unmein se kuch ke saath sangati karna achha nahin hoga. (1 kurinthiyon 15:33; filippiyon 4:8) vahin doosri taraf, shaayad aap jaana chahte hain, lekin aap mammi-paapa se poochhne ki himmat nahin juta paate.

anjam: agar aap isliye nahin jaate, kyonki aapko pata hai ki vahaan jaana sahi nahin hoga, to aap poore yakeen ke saath apne doston ko iski vajah bata paayenge. lekin vahin doosri taraf, agar aap isliye nahin jaate kyonki aapko mammi-paapa se is baare mein poochhne ki himmat nahin hai, to shaayad aap ghar baithe is baare mein sochkar bura mehsoos karte raheinge ki ek aap hi hain jo mauj-masti nahin kar rahe hain.

aap aisa kyon karna chaheinge: aap is baat ko maante hain ki aapke mammi-paapa ko aap par adhikar hai aur aap is baat ki izzat karte hain ki woh jo faisle leinge, woh aapke bhale ke liye hai. (kulussiyon 3:20) aap apne mammi-paapa se pyar karte hain aur aap unhein bina bataye chori-chhipe kahin jaakar unhein dukhi nahin karna chahte. (neetivachan 10:1) unki ijazat maangne se shaayad aapko apni baat kehne ka mauka bhi mil sakta hai.

anjam: aapke mammi-paapa ko lagega ki aap unse pyar karte hain aur unki izzat karte hain. aur agar unhein aapki baat theek lage, to shaayad vo aapko ijazat de dein.

ek vajah samajhne ke liye is misal ki madad leejiye: aap shaayad ek aise samundar mein tairana pasand karein, jahaan alag-alag jagahon par lifeguard yaani aise log hain jo tairte vakt kisi khatre se aapko bacha sakte hain. kyon? kyonki jab aap paani mein maza kar rahe hote hain, us vakt aap khatre ko itni aasani se bhaanp nahin sakte. lekin lifeguard apni jagah se khatron ka aasani se pata laga sakte hain. usi tarah, mammi-paapa ko itna to gyaan aur anubhav hai ki woh door se hi aise khatron ko dekh sakte hain jo aapko nazar nahin aate. lifeguard ki tarah, aapke mammi-paapa aapka maza kirkira nahin karna chahte, balki woh aapko aise khatron se bachana chahte hain, jo aapko zindagi ka maza lootne se roke.

ek aur vajah par gaur keejiye: aapke mammi-paapa aapki hifazat karna chahte hain. woh aapse pyar karte hain isliye jab unhein sahi lagta hai, tab woh aapko ijazat dete hain, lekin zaroorat padne par woh aapko mana bhi karte hain. jab aap kisi cheez ke liye unse ijazat maangte hain, to woh khud se poochhte hain ki agar woh aapko ijazat de dein, to kya woh usse honevale anjam ko bhugatne ke liye taiyar hain. woh tabhi taiyar honge aur aapko jaane ki ijazat deinge, jab unhein khud is baat ka poora yakeen ho ki aapko kuch nahin hoga.

chaar tareeke aapki madad kar sakte hain

imandari: khud se poochhiye: ‘main asal mein kyon jaana chahta hoon? kya is vajah se kyonki mujhe woh kaam karna bahot pasand hai ya fir isliye ki main bhi vahi karna chahta hoon jo mere dost kar rahe hain? kya main isliye jaana chahta hoon kyonki vahaan woh vyakti bhi hoga, jise main pasand karta hoon?’ fir is baare mein apne mammi-paapa ko sach-sach bataiye. woh bhi ek samay par aapki umra ke the aur woh aapko bakhoobee jaante hain, isliye woh aasani se samajh jaayenge ki aapke irade kya hain. unhein achha lagega agar aap unse khulkar baat kareinge aur unse sach boleinge. unki salah se aapko faayda hoga kyonki unhein samajh aur tajurba hai. (neetivachan 7:1, 2) vahin doosri taraf, agar aap sach nahin boleinge, to isse woh aap par bharosa nahin kar paayenge, na hi aap unse “haan” ki ummeed kar sakeinge.

sahi samay: jab aapke mammi-paapa kaam se thakkar ghar pahunchte hain ya fir jab unka dhyan kisi aur kaam par laga hai, to us vakt unse ijazat mat maangiye. unse tab baat keejiye jab woh fursat mein baithe hon. lekin ain vakt ka intazar karke, javab ke liye un par dabav mat daaliye. aapke mammi-paapa ko jaldbazee mein faisla lena nahin pasand aayega. pehle se hi poochhiye aur unhein sochne ke liye vakt deejiye.

poori jaankari: aadhi-adhoori jaankari mat deejiye. saaf-saaf bataiye ki aap kya karna chahte hain. jab aapke mammi-paapa aapse poochhte hain ki “vahaan kaun-kaun honge?” “koi bada vyakti hoga ki nahin?” ya “tum ghar kab aaoge?” to yah mat kahiye “mujhe nahin pata!” is tarah ke javab unhein pareshani mein daal dete hain.

ravaiya: apne mammi-paapa ko dushman mat sochiye. agar aap apne mammi-paapa ko dost ki tarah maane, to aap unke faislon ka virodh nahin kareinge aur woh bhi aapka saath deinge, kyonki unhein aapki parvah hai.

apne mammi-paapa ko saabit keejiye ki aap itne samajhdar hain ki unke faislon ko maanne ke liye taiyar hain aur un faislon ki izzat bhi karte hain. agar aap aisa kareinge, to badle mein woh bhi aapki izzat kareinge. aur agli baar, woh khud aapko ijazat dene ke tareeke dhoondheinge.