aap chhuttiyon mein bahot maze kar rahe hain aur is baare mein apne doston ko batana chahte hain. aap kya kareinge?

1. (1) har kisi ko postcard bhejeinge?

2. (2) sabhi ko email likheinge?

3. (3) online photo post kareinge?

jab aapke daada-daadi aapki umra ke the, to shaayad unhonne pehla tareeka apnaya ho aur aapke mammi-paapa ne shaayad doosra tareeka istemal kiya ho.

lekin aaj bahot se naujavan online photo post karna pasand karte hain. kya aap bhi yahi tareeka apnate hain? agar haan, to is lekh se aap jaan paayengein ki aisa karte vakt aap kin khatron se bach sakte hain.

•  online photo share karne ke kya faayde hain?

•  iske kya khatre hain?

•  aap kya kar sakte hain?

•  aapke hamumra kya kehte hain?

 aap turant photo share kar sakte hain.  “jab main doston ke saath maze kar rahi hoti hoon, to main usi vakt photo share kar sakti hoon.”—melanie.

aap aasani se doosron ke baare mein jaan sakte hain.  “mere doston ki zindagi mein kya chal raha hai, yah jaanne ke liye unhein message karne ke bajay unke post dekhna zyada aasan hai.”—jordan.

aap doston se jude rehte hain.  “mere kuch dost aur parivar ke log mujhse door rehte hain. lekin jab main unke post kiye photo dekhti hoon, to mujhe aisa lagta hai jaise main unke paas hi hoon.”—karen.

 aapki suraksha khatre mein pad sakti hai.  agar aapke post kiye photo se yah pata chale ki aap kahaan hain, to aap khatre mein pad sakte hain. ek website ke anusar, “agar hamare post kiye photo ya video se yah pata lag raha hai ki hum kis vakt kahaan hain, to anjan log internet ke zariye hum par nazar rakh sakte hain aur hamein nuksan pahuncha sakte hain.”

khaaskar chor-lutere aisi jaankari ki talash mein rehte hain. ek sachchi ghatna par dhyan deejiye, ek baar teen choron ne 18 gharon mein ghuskar kareeb 70 laakh se zyada ka saaman loot liya. unhein kaise pata chala ki ghar par koi nahin tha? unhonne un logon ke online post ke zariye un par nazar rakhi.

galat cheezen aapke saamne aa sakti hain.  kuch logon ko isse koi fark nahin padta ki woh kya post kar rahe hain. sara naam ki ek ladki kehti hai, “khatra tab zyada badh jaata hai jab koi aise logon ke post dekhne lagta hai jinhein woh nahin jaanta. yah aisa hai maano woh bina kisi nakshe ke ek anjan shahar mein ghoom raha hai. woh aisi jagah pahunch sakta hai jahaan woh kabhi nahin jaana chahega.”

aapka keemti samay barbad ho sakta hai.  yolanda naam ki ek ladki kehti hai, “logon ke naye-naye post dekhne aur unke comment padhne mein kaafi samay barbad ho sakta hai. hamein har second phone dekhne ki lat bhi lag sakti hai.”

saamantha bhi aisa hi sochti hai. woh kehti hai, “main pehle se tay karti hoon ki main kitni der online rahoongi. agar aap bhi photo sharing account bananevale hain, to khud par kaaboo rakhna seekhiye.”

•   galat kism ki koi photo mat dekhiye. parmeshvar ke ek sevak ne ek baar kaha tha, “main apni aankhon ke saamne koi bekar ki cheez nahin rakhoonga.”—bhajan 101:3.

  “main apne doston ke post dekhta rehta hoon aur agar woh kuch aisa post karte hain jo mere hisab se sahi nahin hai, to main unhein apne doston ki soochi se hata deta hoon.”—steven.

• aise logon se dosti mat keejiye jinke soch-vichar aapse nahin milte. woh chaalchalan ke maamle mein aapki soch bigaad sakte hain. bible kehti hai, “dhokha na khaao. buri sangati achhe usool bigaad deti hai.”—1 kurinthiyon 15:33, footnote

  “duniya ka chalan mat apnaiye. aisa karne se aap galat kaamon mein fans sakte hain. jaise, gaali-galauj karna, ashleel tasveerein dekhna ya doosre galat kaam karna.”—jaisika.

• tay keejiye ki aap kitni der internet chalayenge aur kab-kab photo post kareinge. bible kehti hai, “khud par kadi nazar rakho ki tumhara chaalchalan kaisa hai, moorkhon ki tarah nahin balki buddhimanon ki tarah chalo. apne vakt ka sahi istemal karo.”—ifisiyon 5:15, 16.

  “mainne un logon ke post dekhna band kar diya jo ek hi photo baar-baar post karte hain. jaise, koi samundar kinare gaya aur ek hi seepi ki 20 photo post kar the. un sabhi photo ko dekhne mein bahot samay barbad ho jaata tha.”—rebekah.

• sirf apni hi photo mat post keejiye. yah mat sochiye ki aapke dost hamesha aapke baare mein jaanna chahte hain ya aapko dekhne ke liye taras rahe hain. bible ke ek lekhak paulus ne kaha, “main tummein se harek se jo vahaan hain, yah kehta hoon ki koi bhi apne aapko jitna samajhna chahiye, usse badhkar na samjhe.”—romiyon 12:3

  “kuch log selfie par selfie post karte rehte hain. agar ek ladki meri dost hai, to main jaanti hoon ki woh kaisi dikhti hai, mujhe baar-baar yaad dilane ki zaroorat nahin hai.”—ellison.