bible seemit maatra mein sharab peene ki ninda nahin karti, agar aisa karna aapke yahaan gair-kaanooni nahin hai. lekin bible saaf-saaf batati hai ki piyakkadpan galat hai.—bhajan 104:15; 1 kurinthiyon 6:10.

lekin tab aapko kya karna chahiye jab aap par sharab peene ka dabav aata hai magar aapko pata hai ki un haalaat mein peena gair-kaanooni hoga ya aapke mammi-paapa ko achha nahin lagega?

•  jaam peene ke anjam soch leejiye

•  pakka irada kar leejiye

•  naujavan kya kehte hain

kuch naujavan sochte hain ki mauj-masti karne ke liye sharab peena zaroori hai. lekin jaam peene ke kya anjam ho sakte hain?

• police ya kort-kachahri ka chakkar. aap jahaan rehte hain, vahaan agar sharab peena gair-kaanooni hai, to aap par kai museebatein aa sakti hain. jaise, aapko jurmana bharna pad sakta hai, aap par case ho sakta hai, aapka driving license zabt ho sakta hai, saza ke taur par aapko kuch vakt ke liye samaj seva karni pad sakti hai ya aapko jail bhi ho sakti hai.—romiyon 13:3.

• aapki badnami. sharab peene se aap apne hosh-havaas kho sakte hain. iske nashe mein aap shaayad koi aisi baat keh dein ya aisa kaam kar dein jiska baad mein aapko bahot pachhtava ho. (neetivachan 23:31-33) aajkal jo kuch hota hai woh sab internet par daala jaata hai. isliye aap nashe mein jo bhi karte hain, woh aag ki tarah internet par fail sakta hai aur aapki badnami ho sakti hai.

• aap khud ka bachav nahin kar paayenge. sharab ke nashe mein aap badi aasani se doosron ke shikar ho sakte hain. woh aap par shaareerik ya laingik hamle kar sakte hain. aap doosron ke bahkave mein bhi aa sakte hain. nateeja, aap shaayad aise kaam kar baithein jo khatarnak ya gair-kaanooni hon.

• lat lagna. kuch adhyayanon se pata chala hai ki aap jitni kam umra mein sharab peena shuroo karte hain, utna zyada khatra hai ki aapko sharab ki lat lag jaaye. agar aap tanav, akelepan ya zindagi se oob jaane ki vajah se sharab peete hain, to aap shaayad aisa silsila shuroo kar rahe hain jise rokna bahot mushkil ho sakta hai.

• maut. amreeka mein dekha gaya tha ki paanch saalon ke dauran har saal 1,500 se bhi zyada logon ki maut sharab peekar gaadi chalane se hui. marnevalon ki umra 21 se kam thi. aur haal hi mein dekha gaya ki ek saal ke andar har 52 minat mein ek insan ki maut sharab peekar gaadi chalane se hui. agar aap kisi aisi gaadi mein baithte hain jiske chalanevale ne sharab pi rakhi hai, to aap bada khatra mol rahe hain fir chahe aapne sharab na pi ho.

agar aap pehle se faisla kar lein ki aap kya kareinge to aap un khatarnak aur dardnak anjamon se bach sakte hain jo bahot zyada sharab peene se hote hain.

bible ka siddhaant: “hoshiyar insan khatra dekhkar chhip jaata hai.” (neetivachan 22:3) jab aapko gaadi chalani ho ya koi aisa kaam karna ho jismein aapko poora-poora dhyan dene ki zaroorat hai tab sharab peena buddhimani nahin hogi.

thaan leejiye: ‘agar main sharab peeunga bhi to tab jab haalaat sahi honge aur jab aisa karna kaanooni taur par galat nahin hoga.’

bible ka siddhaant: ‘tum jiski aagya maante ho, usi ke gulam ban jaate ho.’ (romiyon 6:16) agar aap doosre naujavanon ki dekha-dekhi peete hain, to aap unke isharon par naach rahe hain. aur agar aap tanav ya zindagi se oob jaane ki vajah se pi rahe hain, to aap apni pareshaniyon se ladna kabhi nahin seekh paayenge.

thaan leejiye: ‘main apne saathiyon ke dabav mein aakar nahin peeunga.’

bible ka siddhaant: “unke jaisa mat ban jo bahot . . . peete hain.” (neetivachan 23:20) galat logon ki sangati karne se aapka irada kamzor pad sakta hai. agar aap aise logon ke saath mel-jol rakhte hain jo bahot sharab peete hain to aap museebat ko daavat de rahe hain.

thaan leejiye: ‘main un logon ke saath mel-jol nahin rakhoonga jo bahot zyada sharab peete hain.’