bible mein kahin nahin kaha gaya hai ki hamein easter ka tyohar manana chahiye. agar aap iska itihas dekhein to aap jaaneinge ki easter ki shurooat kaise hui. yah tyohar purane zamane ki prajnan ki paramparaon se juda hai. neeche di kuch baaton par gaur keejiye.

1. naam: encyclopædia britannica  kehti hai: “angrezee naam easter kahaan se aaya hai, is baare mein theek-theek nahin pata; aathvin sadi mein pashchimi europe ke pujari bede ke mutabik yah naam vasant ki devi, iyostra se liya gaya tha.” doosri kitabon mein ise feeneeke ki prajnan devi astarte ke naam ke saath joda gaya hai. aisi hi ek devi ko baibilon mein pooja jaata tha jiska naam ishtar tha.

2. khargosh: ye prajnan ke prateek hain, “jinhein europe aur madhya poorvi ilakon mein vasant ritu ke dauran honevale gair-isai dharmon ke tyoharon ke purane rasmon-rivazon aur prateekon se liya gaya hai.”​— encyclopædia britannica.

3. ande: funk and wagnalls standard dictionary of folklore, mythology and legend  ke mutabik maana jaata hai ki easter ke ande easter ke khargosh laate hain. in andon ko dhoondhne ki pratha, “asal mein bachchon ka khel nahin hai, balki prajnan shamta se judi ek dhaarmik pratha hai.” kuch samuday maante the ki saja hua easter ka anda “jaadui tareeke se khushiyaan, samriddhi, sehat aur suraksha laa sakta hai.”​—traditional festivals.

4. easter mein naye kapde: “scandinavia ki vasant ki devi ya istra ka swagat naye kapdon mein na karna asabhya aur ashubh maana jaata tha.”​—the giant book of superstitions.

5. sooraj ugne ke samay ki rasmein: ye rasmein un prathaon se judi hoti hain, jo purane zamane mein sooraj ki pooja karnevale maante the. darasal woh log ye prathayen ‘vasant ritu ki shurooat mein sooraj ka swagat karne aur uski mahashakti ki mahima karne ke liye maante the. unka vishvas tha ki sooraj, ugnevali sabhi cheezon mein maano nayi jaan daal deta hai.’​—celebrations—the complete book of american holidays.

easter ki shurooat ke baare mein the american book of days  kitab saaf batati hai, “ismein koi shak nahin ki apne shurooati dinon mein church ne purane aur jhoothe reeti-rivazon ko apnakar is tarah pesh kiya maano woh maseehi shikshaon ka hissa hain.”

bible chetavni deti hai ki hamein parmeshvar ki upasna mein aisi paramparaon ya reeti-rivazon ko shaamil nahin karna chahiye, kyonki inse parmeshvar khush nahin hota. (markus 7:6-8) doosra kurinthiyon 6:17 mein likha hai, “yahova kehta hai, ‘. . . khud ko unse alag karo aur ashuddh cheez ko chhoona band karo.’” easter gair-isaiyon ka tyohar hai aur jo log parmeshvar ko khush karna chahte hain woh inse door raheinge.