‘apne maata-pita ka aadar karne’ ka kya matlab hai?
shastra se javab
“apne pita aur apni maa ka aadar karna,” yah aagya bible mein kai baar di gayi hai. (nirgaman 20:12; vyavasthavivran 5:16; matti 15:4; ifisiyon 6:2, 3) ismein chaar khaas baatein shaamil hain.
unki kadar keejiye. aapke maata-pita ne aapki khaatir jo kuch kiya hai uske liye unka ehsan maaniye. is tarah aap unka aadar kar rahe honge. aap unki sikhayi hui baaton ko maankar unke liye kadar dikha sakte hain. (neetivachan 7:1, 2; 23:26) bible badhava deti hai ki aapko apne maata-pita par “garv” hona chahiye.—neetivachan 17:6.
unka adhikar sweekar keejiye. khaaskar javani mein jab aap yah baat achhi tarah samajhte hain ki aap par adhikar unhein parmeshvar ne diya hai, to aap unka aadar kar rahe hote hain. kulussiyon 3:20 javanon se kehta hai, “har baat mein apne maata-pita ka kehna maannevale bano kyonki prabhu isse khush hota hai.” yahaan tak ki naujavan yeeshu ne, jo paripoorna tha, apne apripoorna maata-pita ka kehna maana tha.—luka 2:51.
unke saath aadar se pesh aaiye. (laivyavyavastha 19:3; ibraniyon 12:9) ismein aksar yah shaamil hai ki aap kya kehte hain aur kis lehze mein kehte hain. yah sach hai ki kai baar maata-pita is tarah pesh aate hain ki bachchon ke liye unka aadar karna mushkil ho sakta hai. tab bhi unhein maata-pita ka aadar karna chahiye. unhein aisi koi baat nahin kehni chahiye aur na hi aisa koi kaam karna chahiye jisse unka anadar ho. (neetivachan 30:17) bible sikhati hai ki maata-pita ko bura-bhala kehna bahot bada gunah hai.—matti 15:4.
unki zaroorat poori keejiye. budhape mein maata-pita ko aapke sahare ki zaroorat pad sakti hai. yah jaanne ki koshish keejiye ki unhein kis cheez ki zaroorat hai aur use poora keejiye. is tarah aap unka aadar kar rahe honge. (1 timuthiyus 5:4, 8) is maamle mein hum yeeshu se seekh sakte hain. apni maut se theek pehle usne intazam kiya ki uski maa ki dekhbhal ki jaaye.—yuhanna 19:25-27.
maata-pita ko aadar dene ke baare mein kuch galat dhaarnayen
galat dhaarna: apne maata-pita ko aadar dene ka matlab hai unhein apni shaadishuda zindagi mein apna adhikar jamane ki ijazat dena.
sachchai: bible sikhati hai ki pati-patni ka rishta, har paarivarik rishte se badhkar hai. utpatti 2:24 kehta hai, “aadmi apne maata-pita ko chhod dega aur apni patni se juda rahega.” (matti 19:4, 5) yah sach hai ki shaadishuda joda apne maata-pita ya saas-sasur ki salah se faayda paa sakta hai, lekin unhein ek seema tay karni hogi ki unke rishtedar kis had tak unki zindagi mein dakhal de sakte hain.—neetivachan 23:22; matti 19:6.
galat dhaarna: aapko apne maata-pita ke hi adheen rehna hai.
sachchai: haalaanki parmeshvar ne parivar mein maata-pita ko adhikar diya hai, lekin har insani adhikar ki ek seema hoti hai. yah adhikar parmeshvar ke adhikar ki jagah nahin le sakta. udahran ke liye, jab ek badi adalat ne yeeshu ke chelon ko parmeshvar ki aagya todne ka hukm diya to unhonne javab diya, “parmeshvar ko apna raja jaankar uski aagya maanna hi hamara farz hai.” (preshiton 5:27-29) usi tarah bachche “prabhu mein” apne maata-pita ka kehna maante hain, yaani apne maata-pita ki aisi aagya maante hain jo parmeshvar ki aagya ke aade na aati ho.—ifisiyon 6:1.
galat dhaarna: maata-pita ka aadar karne ka matlab hai unka dharm maanna.
sachchai: bible badhava deti hai ki hum jaanchein ki hamein jo sikhaya gaya hai woh sach hai ya nahin. (preshiton 17:11; 1 yuhanna 4:1) jo koi aisa karta hai, ho sakta hai woh aage chalkar ek alag dharm apnayen. bible mein parmeshvar ke aise bahot-se sevkon ki misal di gayi hai jinhonne apne maata-pita ka dharm nahin maana, jaise abraham, root aur preshit paulus.—yahoshoo 24:2, 14, 15; root 1:15, 16; galatiyon 1:14-16, 22-24.
galat dhaarna: maata-pita ka aadar karne ka matlab hai aapko poorvajon ki upasna se jude reeti-rivaz maanne honge.
sachchai: bible kehti hai, “tu sirf apne parmeshvar yahova ki upasna kar aur usi ki pavitra seva kar.” (luka 4:8) ek insan poorvajon ki upasna karke parmeshvar ko naaraz karta hai. bible yah bhi sikhati hai ki “mare huye kuch nahin jaante.” unhein hosh nahin ki koi unka aadar kar raha hai aur na hi woh kisi ki madad kar sakte hain ya use nuksan pahuncha sakte hain.—sabhopdeshak 9:5, 10; yashayah 8:19.
aap shaayad ye bhi dekhna chahein
pavitra shastra se jude savalon ke javab
pavitra shastra buzurg maata-pita ki dekhbhal ke baare mein kya kehta hai?
bible mein aise vafadar logon ke udahran diye gaye hain jinhonne apne buzurg maata-pita ki dekhbhal ki. ismein achhi salah bhi di gayi hai jo dekhbhal karnevalon ki madad kar sakti hai.
hamare baare mein
yahova ke sakshiyon ki sabhayen
pata keejiye ki hamari sabhayen kahaan hoti hain aur hum kaise upasna karte hain.