bible mein aisi kai salah di gayi hain jinki vajah se yahova ke sakshi un par lage har ilzam ko jhootha saabit nahin karte, na hi unka mazak udanevale har insan ko safai dete hain. misal ke liye bible mein ek jagah likha hai, “jo khilli udanevale ko sudharta hai, woh apni hi beizzati karata hai.” (neetivachan 9:7, 8; 26:4) isliye har jhoothe ilzam par dhyan dene ke bajay hum parmeshvar ko khush karne par dhyan dete hain.—bhajan 119:69.

bible yah bhi batati hai ki “chup rehne ka samay” bhi hota hai aur “bolne ka samay” bhi. (sabhopdeshak 3:7) isliye jab log sachchai jaanne ke irade se hamse kuch poochhte hain to hum unki baaton ka javab zaroor dete hain, lekin hum bevajah behas nahin karte. is tarah hum yeeshu aur pehli sadi ke maseehiyon ki misal par chalte hain.

• peelatus ke saamne jab yeeshu par jhoothe ilzam lagaye gaye to usne koi javab nahin diya. (matti 27:11-14; 1 patras 2:21-23) jab kisi ne use petoo aur piyakkad kaha to usne safai pesh nahin ki balki apne kaamon se un ilzamon ko jhootha saabit kiya. usne bible ka yah siddhaant maana, “apne nateejon se buddhi ki jeet hoti hai.” (matti 11:19, footnote) magar zaroorat padne par yeeshu ne un logon ko sakhti se javab diya jo us par jhoothe ilzam lagakar use badnam kar rahe the.—matti 15:1-3; markus 3:22-30.

  yeeshu ne apne chelon ko samjhaya ki agar koi un par jhoothe ilzam lagaye to unhein nirash nahin hona chahiye. usne kaha, “sukhi ho tum jab log tumhein mere chele hone ki vajah se badnam karein, tum par zulm dhaayen aur tumhare baare mein tarah-tarah ki jhoothi aur buri baatein kahein.” (matti 5:11, 12) usne yah bhi kaha ki agar hamein aise haalaat mein gavahi dene ka mauka mile to hum gavahi zaroor dein. aisa karne mein woh hamari madad karega kyonki usne vaada kiya hai, “main tumhein aise shabd aur aisi buddhi doonga ki sab virodhi saath milkar bhi tumhara mukabla nahin kar paayenge, na hi javab mein kuch keh paayenge.”—luka 21:12-15.

• preshit paulus ne maseehiyon ko salah di ki woh virodhiyon ke saath bevajah na uljhein kyonki is tarah ki behasbazee aur jhagdon se “koi faayda nahin hota aur ye bekar hain.”—titus 3:9; romiyon 16:17, 18.

• preshit patras ne maseehiyon ko badhava diya ki jab bhi mumkin ho, woh apne vishvas ki pairvi karein. (1 patras 3:15) lekin usne yah bhi bataya ki apne vishvas ki pairvi karne ka sabse badhiya tareeka hai ki woh apne kaamon se khud ko begunah saabit karein. usne likha, “tum achhe kaam karke  aise moorkhon ka munh band karo jo bina soche-samjhe tumhare khilaf bolte hain.”—1 patras 2:12-15.