hum maante hain ki vigyan ne kaafi kuch haasil kiya hai. hum vigyan ki un khojon par yakeen bhi karte hain jinke saboot hain.

vigyan ka matlab hai, “prakritik niyamon par aadharit krambaddh aur vyavasthit gyaan.” (amar maanak vishal hindi shabdakosh) haalaanki bible vigyan ki kitab nahin hai, fir bhi yah logon ko prakriti ki jaanch karne aur vigyan ki khojon ka faayda uthane ka badhava deti hai. aaiye iski kuch misalon par gaur karein:

• khagol-vigyan: “zara apni aankhein uthakar aasman ko dekho, kisne in taaron ko banaya? usi ne jo gin-ginkar unki sena ko bulata hai, ek-ek ka naam lekar use pukarta hai.”—yashayah 40:26.

• jeev-vigyan: pracheen israel ka raja sulaiman “tarah-tarah ke pedon ke baare mein bataya karta tha, labanon ke devdar se lekar deevar par ugnevale marua tak ke baare mein. woh jaanvaron, pakshiyon, reingnevale jeev-jantuon aur machhliyon ke baare mein bhi bataya karta tha.”—1 raja 4:33.

• chikitsa-vigyan: “dil ka khush rehna badhiya dava hai, magar man ki udasi saari taakat choos leti hai.”—neetivachan 17:22.

• mausam-vigyan: “kya tu barf ke godamon mein gaya hai? kya toone olon ke un bhandaron ko dekha hai . . . ? woh jagah kahaan hai jahaan se poorab ki hava dharti par chalti hai?”—ayyoob 38:22-24.

hum maante hain ki vigyan ne kaafi kuch haasil kiya hai, isliye hamari kitabon mein is baare mein aur prakriti ke baare mein kai lekh chhaape jaate hain. yahova ke sakshi apne bachchon ko badhava dete hain ki woh achhi tarah padhe-likhein taaki apne chaaron taraf ki prakriti ko achhi tarah samajh sakein. sakshiyon mein se kai log vigyan ke alag-alag shetron mein kaam karte hain. jaise kuch sakshi jeev-rasayan vigyani hain to kuch ganit ke vidvan aur kuch bhautik-vigyani bhi hain.

hum yah nahin maante hain ki vigyan ke paas insan ke sabhi savalon ke javab hain. * udahran ke liye, bhoovigyani yah adhyan karte hain ki dharti kin cheezon se bani hai aur maanav jeev-vigyani yah adhyan karte hain ki hamara shareer kaise kaam karta hai. magar woh yah nahin bata paate ki dharti, insanon aur jeev-jantuon ke liye ekdam sahi kaise bani aur yah bhi ki shareer ke angon ka saath milkar kaam kar paana kaise mumkin ho paata hai?

hum is nateeje par pahunche hain ki in savalon ke sahi-sahi javab sirf bible mein diye gaye hain. (bhajan 139:13-16; yashayah 45:18) isliye hum maante hain ki achhi shiksha haasil karne ka matlab hai, vigyan aur bible donon se seekhna.

kai baar aisa lag sakta hai ki vigyan ki baatein, bible mein likhi baaton se mel nahin khaatin. magar iski vajah shaayad yah ho ki logon ko sahi-sahi nahin pata ki bible asal mein kya sikhati hai. udahran ke liye, bible yah nahin sikhati ki jab dharti ki srishti chhe: dinon mein hui to har din 24 ghanton ka tha.—utpatti 1:1; 2:4.

kuch siddhaant hain jinke baare mein zyadatar log maante hain ki woh vigyan ke mutabik sahi hain. magar is baat ka koi saboot nahin hai aur kuch jaane-maane vaigyanik bhi un siddhaanton ko sach nahin maante. udahran ke liye, hum bahot-se jeev-vigyaniyon, rasayan-vigyaniyon aur doosre logon se sahmat hain jo maante hain ki prakriti saboot deti hai ki ise buddhimani se racha gaya tha. lekin hum yah nahin maante ki jeev-jantuon mein dheere-dheere badlav huye aur jo sabse yogya the woh zinda rahe aur is tarah vikas se sabhi jeevit prani vajood mein aaye.