kanada ke albarta praant ki baat hai. bob apni gaadi se ghar jaa raha tha. us vakt tez hava chal rahi thi aur kadake ki thand pad rahi thi. woh kareeb 100 kilometer ki raftar se jaa raha tha ki tabhi achanak gaadi ke baayin taraf ka pichhla tire puncture ho gaya. shuroo-shuroo mein bob ko pata nahin chala lekin fir use laga ki tire ki hava nikal gayi hai. par usne socha, ‘ghar to bas paanch kilometer door hai, main ghar jaakar dekh loonga.’

 iske baad kya hua? bob ne ek khat mein apni kahani aage batayi, jo usne us ilake mein yahova ke sakshiyon ke raaj-ghar ko bheja tha. usne likha, “ek gaadi mein paanch javan sakshi the. unhonne apni khidki ka sheesha neeche kiya aur mujhe bataya ki mere tire ki hava nikal gayi hai. hamne kinare par apni gaadiyaan rok di. unhonne kaha ki woh mera tire badal deinge. mujhe yah tak pata nahin tha ki mere paas ek aur tire ya jack hai ya nahin. main highway ke kinare apni wheelchair par baitha tha. itne mein woh bachche gaadi ke neeche ghuskar tire aur jack nikaal laaye aur tire badal diya. kadake ki thand aur barf pad rahi thi. unhonne achhe kapde pehne the, fir bhi unhonne meri madad ki jis vajah se main apni gaadi chala paaya. sach mein agar woh na hote, to pata nahin main kya karta!

 main in paanch sakshi bachchon ka dil se dhanyavad karna chahta hoon. ye bachche us vakt prachar hi kar rahe the jab unhonne meri madad ki. main unki madad ke liye bahot shukraguzar hoon. agar woh nahin aate, to main bahot buri taraf fans jaata. mujhe aisa laga jaise bhagvan ne us din meri khaatir in farishton ko bheja tha.”