Wala sing kauturan naton nga napatay ukon nasamaran sa linog nga ginapatihan nga amo ang pinakamabaskog nga nag-igo sa Albania sa sulod sang 40 ka tuig. Pero 35 ka balay sang aton mga kauturan kag 3 ka bilding nga ginagamit bilang mga Kingdom Hall ang delikado na gamiton.

Ang 6.4-magnitude nga linog sa Albania natabo sang Nobiembre 26, 2019. Bangod sini, 51 ka tawo ang napatay, sobra 3,000 ang nasamaran, kag linibo ang napilitan nga magbakwit. Ang mga Saksi nga nagbakwit nagaistar lang anay sa ila mga paryente ukon sa mga kauturan sa iban nga mga kongregasyon. Ang mga kongregasyon nga indi makagamit sang ila mga Kingdom Hall bangod nahalitan ini nagatipon lang anay sa indi delikado nga mga lugar.

Ang isa ka gulang nagsugid kon paano nakabulig sa iya pamilya ang paghanda para sa mga kalamidad: “Paglinog, ginbitbit namon dayon ang amon mga ‘go bag’ kag nagdalagan paggua sa balay. Nagamit gid namon ang importante nga mga butang nga ara sa amon mga bag: mga habol, tubig, bulong, kag pagkaon. Nagapasalamat kami kay Jehova kag sa Nagadumala nga Hubon sa ila gugma kag pag-atipan sa amon.”

Ang mga manugtatap sa sirkito gilayon nga nagkadto sa naapektuhan nga mga lugar para mag-shepherding kag palig-unon ang aton mga kauturan. Ang isa ka manugtatap sang sirkito kag ang iya asawa nagbakwit man sang nahalitan ang ila apartment. Pero bisan pa mabudlay ang ila sitwasyon, gingamit gihapon nila ang ila madamo nga tion para palig-unon ang iban.

Ang mga miembro sang Komite sang Sanga nagbisita man sa mga lugar diin grabe gid ang epekto sang linog. May isa ka Disaster Relief Committee nga nagadumala sang paghatag sang bulig sa mga naapektuhan.

Ginapangamuyo naton nga padayon nga makabatas ang aton mga kauturan sa Albania. Ginahulat naton ang tion nga wala na sang mga kalamidad.—Roma 8:25.