Ang 2022 amo ang ika-100 ka tuig nga anibersaryo sang mga Saksi ni Jehova sa Albania.

Si Nasho Idrizi amo ang isa sa una nga taga-Albania nga nangin Saksi ni Jehova. Sang nagaistar sia sa United States sang mga 1920, nagtuon sia sa Biblia upod sa International Bible Students, nga amo ang pagtawag sadto sa mga Saksi ni Jehova.

Nagpauli si Nasho sa Albania sang 1922. Sang ulihi, ang iban nga taga-Albania nga nangin mga Estudyante sang Biblia sang didto sila sa United States nagpauli man para isugid sa iban ang ila natun-an.

Si Thanas Duli isa sa mga una nga Estudyante sang Biblia sa Albania. Sia nagsiling: “Sang 1925, may tatlo ka kongregasyon sa Albania, may mga Estudyante sa Biblia man sa naligwin nga mga lugar kag may interesado nga mga tawo sa lainlain nga mga bahin sang pungsod.”

Sadto nga tion, may pila na ka publikasyon nga gin-translate sa Albanian, pareho sang The Harp of God kag A Desirable Government. Ang Disiembre 1, 1925, nga gua sang The Watch Tower nagsiling nga “madamo [nga publikasyon nga Albanian] ang ginpanagtag sa mga tawo, kag nalipay ang mga taga-Albania nga matun-an ang Biblia.”

Ginatawag sang mga tawo ang mga Saksi nga ungjillorë, buot silingon “mga ebanghelisador,” kay mapisan sila magbantala. Si Nasho Dori, nga ginbawtismuhan sang 1930, nagsiling: “Sang 1935, nag-arkila ang amon grupo sing bus agod magbantala sa banwa sang Këlcyrë. Dayon, nagbantala pa gid kami sa iban nga lugar sa Albania. Nagbantala kami sa mga banwa sang Përmet, Leskovik, Ersekë, Korçë, Pogradec, kag Elbasan. Iguigo lang nga natapos namon ang amon pagbantala sa Tirana agod saulugon ang Memoryal sang kamatayon ni Cristo.”

Sang 1939, ang gobierno sang Italy nga fascist nagsakop sang Albania kag gin-ban sini ang mga Saksi ni Jehova. Bangod nagpabilin nga neutral ang aton mga kauturan kag nangindi sila nga mag-entra sa Greco-Italian War, ginhingabot sila. a Sa tion sang inaway, 15 ka brother ang ginpriso. Si Brother Nikodhim Shyti gindala sa concentration camp kag wala na sia makita liwat.

Sang lapit na matapos ang World War II, ginsakop sang Communist Party ang Albania sang 1944. Nagpadayon ang paghingabot. Madamo sang aton mga kauturan ang ginpriso kag gin-torture. Ang iban ginpadala sa mga labor camp nga malayo sa ila mga pamilya. Sa sadtong mga tinuig, napain ang Albania sa bilog nga kalibutan. Ang 1959 nga Yearbook of Jehovah’s Witnesses nagreport: “Bisan pa nga ginpain sang gobierno sa Albania ang mga kauturan sa New World Society, indi nila mapunggan ang pagpanghikot sang balaan nga espiritu sang Dios sa mga kauturan.” Sang 1967, nagdeklarar ang Albania nga sila ang pinakauna nga atheist nga pungsod. Ang pila ka nabilin nga mga Saksi didto padayon nga nagaalagad sa Dios, pero nagahalong gid sila.

Sang indi na Komunista ang nagagahom sa pungsod, nangin legal na ang mga Saksi ni Jehova sang Mayo 22, 1992, pagkatapos sang masobra 50 ka tuig nga pag-ban sa ila.

Subong, may 5,550 na ka Saksi sa Albania sa 89 ka kongregasyon. Nalipay gid kita upod sa aton mga kauturan nga “padayon nga naglapnag kag nagmadinalag-on ang pulong ni Jehova sa gamhanan nga paagi” bisan sang grabe nga paghingabot.—Binuhatan 19:20.