Sang Domingo, Nobiembre 21, 2021, gin-release ni Brother Eric Raffaeli, miembro sang Branch Committee sa Angola, ang digital edition sang Bag-ong Kalibutan nga Badbad Sang Cristianong Griegong Kasulatan sa Kimbundu nga lenguahe. Ang naimprinta nga mga kopya sini mangin available sa 2022. Ining narekord na nga daan nga programa gin-stream sa mga 11,000 ka tumalambong.

Sang mga 1920, gin-ban sang nagagahom nga Portuguese nga gobierno ang paghambal kag pagtudlo sang Kimbundu kag sang iban pa nga lenguahe sa Africa. Gindumilian ini nga gamiton sa mga eskwelahan. Pero subong, ang Kimbundu amo ang lenguahe sang mga 1.7 ka milyon ka tawo sa Angola, pati na sang mga residente sa kapital nga siudad, ang Luanda. Isa ini sa panguna nga mga lenguahe sang pungsod.

Ang literatura sang mga Saksi ni Jehova available na sa Kimbundu halin pa sang mga 1990. Pero ang una nga kongregasyon nga nagahambal sang Kimbundu nagsugod lang sang 2008. Subong may 2,614 na ka manugbantala nga nagaalagad sa 55 ka kongregasyon nga nagahambal sang Kimbundu.

Para sa madamo nga bumalasa, ining bag-o nga translation mas mahapos maintiendihan sangsa nauna nga translation sang Biblia. Halimbawa, sa nauna nga translation, ang Mateo 5:3 gin-translate nga: “Bulahan ang mga imol sa espiritu.” Ini nga teksto gin-translate sang Bag-ong Kalibutan nga Badbad nga: “Malipayon ang mga nakahibalo nga kinahanglan nila ang Dios.”

Ang isa ka translator nagsiling: “Sigurado ako nga ini nga Biblia mangin pagpakamaayo gid sa aton mga kauturan nga nagahambal sang Kimbundu. Magamit nila ini sa ila personal nga pagtuon, sa ila ministeryo, kag makabulig ini sa ila nga mangin suod pa gid kay Jehova. Ginakabig ko nga daku nga pribilehiyo nga mangin gamay nga bahin sini nga proyekto. Para sa akon, mahigugmaon nga kaayo ini ni Jehova.”

Bal-an ta nga ini nga Biblia sa Kimbundu nga lenguahe makabulig sa aton kauturan nga nagahambal sang Kimbundu. Magamit ini nila sa pagbulig sa mga interesado nga ‘mahangpan ang sagrado nga mga likom sang Ginharian sang Dios.’—Lucas 8:10.