Sa isa ka espesyal nga programa nga ginhiwat sang Septiembre 23, 2023, gin-release ni Brother Johannes De Jager, miembro sang Branch Committee sa Angola, ang mga libro sang Biblia nga Mateo kag Binuhatan sang mga Apostoles sa Angolan Sign Language (LAS). Mga 1,881 ang nag-attend sang programa sa Assembly Hall sa Luanda, Angola. Puede na dayon ma-download sa jw.org kag sa JW Library Sign Language nga app ang bag-o gin-release nga mga libro sang Biblia.

Ginabanta nga halos 360,000 ka apa ang nagaistar sa Angola. Ang una nga LAS nga kongregasyon naporma sang 2010. Subong, sobra 1,000 ka manugbantala ang nagaalagad sa 37 ka LAS nga kongregasyon, 7 ka group, kag isa ka pregroup sa bilog nga Angola.

Amo ini ang una nga tion nga may gin-translate nga libro sang Biblia sa LAS. Sang matan-aw sang isa ka brother ang libro sang mga Binuhatan, sia nagsiling: “Exciting gid ang pag-translate sang Binuhatan 8:26-30, sang nagdalagan si Felipe para lagson ang Etiopianhon nga opisyal. Nakabulig ini sa akon nga maintiendihan kon ngaa kinahanglan padayon gid ako nga magpangabudlay sa ministeryo.”

Nagasalig kita nga ang pag-release sining duha ka libro sang Biblia sa LAS makabulig sa madamo nga mabatyagan ang gugma ni Jehova samtang ‘ginapasilak niya ang iya nawong sa ila.’—Numeros 6:25.