Sang Disiembre 3, 2022, gin-release ni Brother Samuel Campos, miembro sang Branch Committee sa Angola, ang mga libro sang Biblia nga Mateo kag Binuhatan sa Chokwe kag Ibinda nga mga lenguahe. Ini nga mga libro sang Biblia gin-release sa digital nga pormat paagi sa narekord na nga daan nga programa, nga gin-stream sa mga 2,000 ka tumalambong.

Ang kasaysayan sang mga Saksi ni Jehova sa Chokwe nga lenguahe nagsugod sang 2007 sang naporma ang una nga Chokwe nga grupo. Subong, may 10 na ka Chokwe nga kongregasyon sa Angola kag 23 sa Democratic Republic of the Congo.

Ang isa ka Chokwe nga translator nagsiling: “May pila ka bersion sang Biblia sa Chokwe nga lenguahe. Ang isa sini mahapos intiendihon ang mga tinaga, pero paraphrase ukon pinagusto lang ini nga translation. Ang isa naman, mas kompleto nga transalation pero mabudlay intiendihon. Sang ginbasa ko ining bag-o gin-release nga translation, pamatyag ko daw ako gid ang ginaistorya ni Jehova.”

Ang una nga kongregasyon nga nagahambal sang Ibinda ginporma sang 2014. Subong, may ara na 13 ka kongregasyon ini nga lenguahe. Antes gin-release ang mga libro sang Mateo kag Binuhatan sa Ibinda, wala gid sang bisan ano nga porsyon sang Biblia sa sini nga lenguahe. Gani, ang Portuguese nga New World Translation ang ginagamit sang mga kauturan. Ang isa ka translator sang Ibinda nagsiling: “May mga bersikulo sa Biblia nga madamo nga beses ko na nga nabasa pero subong ko lang mas naintiendihan sing maayo. Isa gid ka pribilehiyo nga mangin bahin sini nga proyekto. Ginpabakod sini ang akon pagtuo.”

Nagasalig kita nga ining gin-release nga mga Biblia sa Chokwe kag Ibinda makabulig sa aton mga kauturan nga mangin mas suod kay Jehova.—Santiago 4:8.