Sugod sang Hulyo 23 asta 28, 2024, ginhiwat ang 39th Luanda International Fair sa Luanda, Angola. Sa sining event nga ginahiwat kada tuig, makita ang mga display sang halos 1,800 ka exhibitor kag halos 100,000 ka tawo ang nagkadto. Ang mga Saksi ni Jehova nagplastar sang booth nga may base sa Biblia nga mga publikasyon sa siam ka lenguahe. May mga pulungkuan man para sa mga bisita nga interesado sa aton interactive nga pagtuon sa Biblia. Ginpakita sing 227 ka beses kon paano ginahimo ang pagtuon kag sobra 100 ka tawo ang nangabay nga kadtuan sila sa ila balay.

May isa ka babayi nga nagpalapit sa booth kag nagsiling nga gusto niya magtuon sa Biblia. Gani, gintanyagan sia sang sister sang Bible study. Samtang nagaistoryahanay sila, madamo sang pamangkot ang babayi kag gusto gid niya mabal-an ang mga promisa sang Biblia sa palaabuton. Subong, regular na sia nga naga-Bible study upod sa sister.

May isa naman ka babayi nga nakibot sang nabal-an niya nga libre lang ang aton ginahimo nga pagtudlo sa Biblia. Nagsiling ang aton sister nga ginahimo naton ini bangod gusto naton isugid ang maayong balita sang Ginharian sang Dios sa madamo nga tawo kon posible. Sang nabal-an sang sister nga ini nga babayi nakaagi na tuon upod sa mga Saksi sang una, ginpatan-aw niya sia sang video nga Ano ang Ginahimo sa Kingdom Hall? Nalipay ang babayi sang nabal-an niya nga welcome gid ang tanan sa aton mga miting, kag nagsiling sia nga gusto pa niya magtuon sing dugang.

Nalipay ang isa ka babayi nga taga-Portugal sang nakita niya ang mga Saksi ni Jehova sa fair. Nagsiling sia nga pirme niya maistorya ang iya kaingod nga isa man ka Saksi. “Bilib gid ’ko sa inyo organisasyon, kag gusto ko madugangan ang akon nabal-an parte sa inyo!” siling niya. Nagsiling ang babayi nga mapa-Bible study sia sa iya kaingod kon magpauli na sia.

Nalipay gid kita nga madamo nga tawo sa Angola ang nagapakita sing interes sa pagtuon sing dugang sa Biblia kag nanamian magbaton sang pangagda ni Jehova nga magkari kag “magkuha sang tubig sang kabuhi nga wala sing bayad.”—Bugna 22:17.