Sang Abril 3, 2024, may ginbuksan nga temporaryo nga exhibit nga may tig-ulo “Purple Triangles: A Story of Courage and Resilience” sa Holocaust Museum sa Buenos Aires, Argentina. Ini nga exhibit bukas sa mga tawo asta sa Agosto 4, 2024.

Sobra 16,000 ka Saksi ni Jehova ang ginhingabot sang mga Nazi bangod wala sila nagsoldado ukon nagsuporta sa mga Nazi. Mga 4,500 ang ginpadala sa mga concentration camp, kag mga 1,750 ang napatay. Ang mga Saksi ni Jehova sa mga concentration camp ginpasuksok sang uniform nga may nakatahi nga purple nga triangle.

Ang exhibit naggamit sang impormasyon halin sa kasaysayan kag sa mga eksperiensia sang mga tawo nga nakahibalo kon ano ang natabo sadto nga tion, para ipakita kon paano nangin matutom ang mga Saksi ni Jehova kag nagpabilin nga mabakod. Ang mga audio guide, touch screen, kag madamo nga video available sa Argentinean Sign Language, English, kag Spanish. May ara man mga tour guide nga nagabulig sa mga bisita sa exhibit.

Ginpakita man sa exhibit ang kopya sang isa ka dokumento nga gingamit sang mga Nazi para pauntaton ang mga Saksi nga mag-alagad kay Jehova. Sulitsulit nga ginpilit ang mga kauturan nga magpirma sang dokumento nga nagasiling nga mauntat na sila sa pag-alagad kay Jehova kag indi na sila mangin Saksi ni Jehova. Kon pirmahan nila ini, paguaon sila sa concentration camp. Pila lang gid ka Saksi ang nagpirma. Ang isa sa manami nga bahin sang exhibit amo nga ginapaimadyin sa mga bisita kon ano ang natabo sa mga Saksi ni Jehova sina nga tion. Ginahatagan sila sang kopya sang dokumento kag ginapaimadyin sa ila kon ano nga kaisog kag kabakod ang kinahanglan para pangindian ang pressure nga magpirma.

Si Professor Isabel Burnstein, nga isa ka researcher sa mga pagtuon parte sa Holocaust, nag-tour sa sini nga exhibit. “Nakabulig ang exhibit nga maintiendihan sang mga bisita kon ngaa nangindi ang mga Saksi ni Jehova nga sikwayon ang ila mga pagpati kag magdesisyon nga himuon kon ano ang husto,” siling niya. “Sa sining kalibutan nga daw wala na sing labot ang mga tawo sa kon ano ang husto, ang ila mga istorya makabulig sa aton nga pangapinan kon ano ang husto kag importante.”

Halin sang nagbukas ang exhibit, sobra 8,400 na ang nakabisita diri. Si Brother Marcos Donadío, nga isa ka spokesman para sa mga Saksi ni Jehova sa Argentina, nagsiling: “Para sa mga wala nakakilala sa mga Saksi ni Jehova, ini nga exhibit makabulig sa mga tawo nga mas maintiendihan ang amon kasaysayan kag ang pagpati nga nagagiya sang amon kabuhi. Excited gid kami kag nagalaum nga mas madamo pa nga tawo ang makakita sini.”

Nagapasalamat gid kita sa sining exhibit nga nagasugid parte sa kaisog kag katutom sang katawhan ni Jehova. Kabay nga ang mga halimbawa sang matutom nga mga utod magabulig sa aton nga himuon ang tanan naton nga masarangan nga makapabilin nga ‘malig-on tubtob sa katapusan.’—1 Corinto 1:8.