Nakasaylo na ang pamilya Bethel sa Argentina sa bag-o natukod nga pasilidad sang branch. Natapos sang contractor ang konstruksion sang tig-ilinit sang 2021. Dayon, ang mga Bethelite kag ang mga boluntaryo sa konstruksion naghimo sang nabilin nga mga ulubrahon sa sulod sang mga bilding. Halimbawa, sila ang nag-asembol sang mga furniture, nagpaninlo, kag nagtakod sang plumbing kag sang mga linya sang kuryente.

Ang pasilidad may mga opisina nga may 136 ka workstation kag duha ka residential building nga may 98 ka kuarto. Ang branch sadto madamo sing bilding kag ara sa sarisari nga lugar. Ang bag-o nga branch ara lang sa isa ka lote. May kalaparon ini nga 8,524 metros kuadrados kag ara lang sa gua sang Buenos Aires, ang kapital sang Argentina.

Si Brother Humberto Cairo, miembro sang Branch Committee, nagsiling: “Makita gid ang kaalwan ni Jehova sa sini nga proyekto. Matahom gid ining bag-o nga mga bilding, ilabi na ang tuman kaathag nga logo sang jw.org.”

Si Brother Sebastian Rosso, nga ara sa Service Department, nagsiling: “Daku gid ini nga regalo ni Jehova. Bagay gid ini sa amon mga kinahanglanon. Nagapasalamat gid kami sa sining matahom kag kompleto nga pasilidad sang branch.”

Nagasalig gid kita nga ining bag-o nga pasilidad sang Bethel makabulig nga mangin madasig ang aton hilikuton kag makapanaksi gid sa mga kaingod, para sa kadayawan ni Jehova.—2 Cronica 7:1.