Sa probinsia sang San Luis, sa Argentina, ang aton mga kauturan nagahiwat sing mga miting kada semana kag nagadumala sing mga pagtuon sa Biblia paagi sa videoconference, sa mga priso sang isa ka maximum-security nga prisuhan. Amo ini ang una nga tion nga gingamit sang aton mga kauturan sa Argentina ini nga paagi, sa pagpanaksi sa mga priso.

Sa sulod na sang mga tinuig, ang aton mga kauturan regular nga nagabisita sa maximum-security nga prisuhan para maghiwat sing mga miting kag magdumala sing mga pagtuon sa Biblia. Pero, sang nag-lockdown ang pungsod sugod ang Marso 2020, wala na anay sila nagkadto sa mga prisuhan. Ginpasugtan sila sang mga awtoridad sa prisuhan nga padayunon ang ila pagtudlo sa mga priso paagi sa videoconference.

Sang makita sang direktor sang prisuhan ang maayo nga epekto sang pagbisita sang aton mga kauturan sa mga priso, nagtambong man sia sa mga miting upod sa iya asawa. Nagsiling sia: “Daku gid ang nabulig sini nga mga miting para magmalipayon kag mangin suod sa Dios ang mga priso, labi na gid subong nga indi sila mabisitahan sang halin sa gua. Nakabulig man ini nga mangin mas mahidaiton ang mga priso. Maathag gid nga daku ang nabulig sang pagtuon sa Biblia sa amon tulumuron nga buligan ang mga priso nga mangin mas maayo nga miembro sang komunidad.”

Isa ka priso ang nagsulat sa mga kauturan nga nag-organisar sang pagtudlo sa mga prisuhan. Nagsiling sia: “Sa mga adlaw nga nagagua ako sa akon selda para magtambong sa mga miting . . . nagakadula ang akon kakapoy, problema, stress, kag kasubo, kag nabatyagan ko gid ang matuod nga kalipay. Madamo gid nga salamat.”

Samtang padayon pa ang pandemic sa bilog nga kalibutan, napalig-on kita sang mga balita nga ang aton mga kauturan nagabulig sa mga tawo nga makabenepisyo sa mensahe sang Biblia.—Isaias 48:17, 18.