Halin sang Mayo 20 asta Hunyo 11, 2023, ginhiwat ang FIFA U-20 World Cup sa apat ka dalagku nga siudad sa Argentina. Ginbanta nga sobra 400,000 halin sa Argentina kag halin sa iban nga pungsod ang nag-attend sa sini nga event, nga naglawig sing tatlo ka semana. Ang mga literature display cart ginplastar sa lainlain nga oras kag lokasyon. Mga 500 ka kauturan ang nagpartisipar sa sini nga pagbantala nga hilikuton, kag sobra 500 ka literatura ang napanagtag. Gin-agda sang mga Saksi ang madamo nga tawo nga buksan ang jw.org para masabat ang ila mga pamangkot parte sa Biblia.

Ang isa ka lalaki nga nagaistar sa sini nga lugar nagpalapit sa mga Saksi sa cart kag nagsiling nga nanamian sia mamati sa mga podcast samtang naga-exercise. Ginpakita sa iya sang isa ka brother ang jw.org kag gintudluan sia kon paano mag-download sang mga publikasyon sa audio nga pormat. Nagsiling ang lalaki nga ilakip niya ang aton mga publikasyon sa iya playlist.

Para makuha ang atension sang mga bisita halin sa iban nga pungsod, ang mga display sa cart may siam ka lenguahe. Dugang pa, madamo nga manugbantala ang nagtuon sang pila ka panamyaw sa sarisari nga mga lenguahe para matamyaw nila ang mga nagapalapit sa cart. Ang isa ka brother nga nagpartisipar sa sini nga public witnessing nagsiling: “Ang tanan nga ginhimo para mabantalaan ang mga tawo halin sa sarisari nga pungsod nakabulig sa akon nga makita nga si Jehova maayo gid kag wala sang pinilian. Nalipay gid ako sa sini.”

Makalilipay nga ginpasugtan sang mga organizer ang mga Saksi ni Jehova nga magplastar sang mga cart sa mga lugar nga wala masami ginatugutan ang mga bisita nga magtipon, bangod sa seguridad. Parte sa ila desisyon, ang isa ka organizer nagsiling, “Nabal-an namon nga ang mga Saksi ni Jehova malinong gid nga mga tawo kag wala nagapanghalit.” Bilang resulta, nabantalaan sing maayo ang mga security personnel.

Makapalig-on nga makita nga ginahimo sang mga alagad ni Jehova ang tanan para mabantalaan ang tanan nga klase sang tawo kag masab-ug ang binhi sang kamatuoran sang Ginharian sa bilog nga duta.—Manugwali 11:6.