Ang mga Saksi ni Jehova sa Republic of Armenia hilway nga makasimba kag wala sang dalagku nga mga balagbag sa ila paghimo sang mga hilikuton sang ila relihion. Legal sila nga ginkilala sang Oktubre 2004.

Pero asta sang Oktubre 2013, ginabudlayan gid ang mga Saksi sa Armenia bangod wala sang alternative civilian service nga para sa ila. Kay man, ginakontrol sang militar ang alternative civilian service kag nagalakip ini sang silot. Halin sang 1993, ginatos ka pamatan-on nga mga lalaki nga Saksi ang nangindi nga magsoldado bangod sa konsiensia, gani ginsentensiahan sila sang malawig nga pagkapriso kag ang iban nag-antos sa mabudlay katama nga mga sitwasyon. Sang ulihi, sang Hunyo 8, 2013, ginsunod sang Armenia ang ila Alternative Civilian Service Law sa standard sang Europe. Sang Oktubre 23, 2013, gin-aprobahan sang Republican Commission ang una nga mga aplikasyon para sa alternative civilian service sang 57 ka Saksi ni Jehova. Madinalag-on gid ini nga programa kay nakaserbisyo ang mga Saksi sa ila pungsod nga wala nagakompromiso.

Bisan sa sining dalagku nga mga pagbag-o, nakaeksperiensia gihapon ang mga Saksi ni Jehova sang diskriminasyon. May pila ka banwa nga indi maghatag sang permit para magpatindog sang mga lugar nga tipunan para sa pagsimba. Grabe man kadaku sang ginasukot nga buhis sang mga opisyal sang custom para makasulod ang mga literatura sang mga Saksi, kag ginapasipalahan sang mga manugpamatok ang mga Saksi paagi sa media kag sa iban pa nga mga public forum. Ang mga Saksi ni Jehova nagpasaka na sang kaso sa mga korte sa sulod kag sa gua sang pungsod para masolbar ini nga mga isyu.