Ang una nga bahin sang pag-shoot sang Episode 1 sang Ang Maayong Balita Suno kay Jesus natapos sang Agosto 12, 2022. Pagkatapos sang malip-ot nga pahuway, masugod dayon ang pag-shoot sang ikaduha nga bahin, nga matapos sa Oktubre 2022.

Sa nauna nga report, ginsugdan sang mga utod ang pag-shoot sa indoor nga mga set sang Ang Maayong Balita Suno kay Jesus sang Mayo 20, 2022. Sina nga tion, ginahulat pa sang mga kauturan ang final documentation para sa mga bahin sang isa ka support building kag sang outdoor nga historical film set. Ang mga dokumento na-finalized sang Hulyo 15, 2022. Gintugyan sang Australasia Branch Construction Department ang bilding kag ang film set sa Regional Video Team (RVT). Magamit na gid ining tanan nga pasilidad para sa shooting sang proyekto.

Sobra 500 ka boluntaryo halin sa Australia kag New Zealand ang nagbulig sa pagtukod sang sobra 7,000 ka metro kuadrado nga set para sa shooting. Ginsigurado nila nga ang mga bilding, ang palibot, kag ang iban pa nga mga butang sa sini nga set daw pareho gid sang panahon ni Jesus. Parte sa konstruksion, si Brother Russell Grygorcewicz, ang Construction Committee coordinator, nagsiling: “Madamo kami sing naatubang nga kabudlayan, pero nakita gid namon ang bulig ni Jehova sa pagsolbar sini tanan. Sigurado gid nga nahimo namon ini paagi sa espiritu ni Jehova.”

Si Brother Ronald Curzan, nga kabulig sa Teaching Committee, ara gid sa kalabanan nga shooting sang una nga bahin. Sia nagsiling: “Dalayawon gid ang pagbinuligay kag pag-abyanay sang mga boluntaryo sa konstruksion kag sang pamilya Bethel. Makakulunyag gid nga nagamit na sing bug-os ang mga set pagkatapos sang tinuig nga pagplano kag konstruksion. Makalilipay nga makita ang tinagipusuon nga pagsuporta sang mga kauturan sa bilog nga teritoryo sang branch. Sigurado nga may daku gid nga epekto sa mga tawo sa bilog nga kalibutan ining 18 ka episode nga video sang kabuhi kag pagpanudlo ni Jesus.”

Si Brother Kenneth Cook sang Nagadumala nga Hubon, nga ara sang nagahingapos ang shooting sang una nga bahin sang Episode 1, nagsiling: “Maathag gid nga ang aton mahigugmaon nga Amay nga si Jehova nagasuporta sini nga proyekto. Ginapasalamatan naton si Jehova kag ang tanan nga nagbulig sa konstruksion sang mga set kag sa pag-shooting bangod sa ila pagsakripisyo kag mahigugmaon nga pagpangabudlay. Nagapangamuyo kita nga ining espesyal nga serye sang video makabulig sa madamo nga sundon sing mas maayo pa gid si Jesus kag mangin suod kay Jehova.”