Ang European Court of Human Rights (ECHR) nagpagua sang duha ka importante nga mga desisyon pabor sa mga Saksi ni Jehova sa Azerbaijan sang Septiembre 24, 2020. Ang una nga desisyon parte sa kaso nga Valiyev and Others v. Azerbaijan, kag ang ikaduha parte sa kaso nga Religious Community of Jehovah’s Witnesses v. Azerbaijan. Ini nga mga desisyon naghatag sing dugang nga proteksion sa legal nga kinamatarong sang aton mga kauturan sa pagsimba.

Sa duha ka kaso, gindeklarar sang Azerbaijan nga nalapas nila ang legal nga mga kinamatarong sang aton kauturan. Nagpasugot man ang gobierno nga bayaran ang mga kauturan sing 19,000 euros ($22,146 U.S.) nga danyos. Ang mga desisyon sang ECHR nagapakita nga ginabaton sang ECHR ang deklarasyon sang Azerbaijan.

Ang Valiyev and Others v. Azerbaijan, nga ginpasaka sa ECHR sang 2011, nagadalahig sa mga utod sa siudad sang Ganja. Pila na ka tuig nga ginapunggan sang mga awtoridad nga marehistro ang aton organisasyon. Amo nga naanad na ang mga awtoridad sa pagpauntat sa aton mahidaiton nga mga miting, pag-aresto sa tanan nga nagatambong, kag pagmulta sing tuman kadaku nga kantidad sa mga nagtambong. Ang isa ka utod pila ka beses nga ginpamatbatan kag ginmultahan, nga sang ulihi naglab-ot na sa 9,450 Azerbaijani Manats ($11,375 U.S. sadto nga tion). Ang pila ka utod gin-aresto kay indi sila makabayad sang tuman ka mahal nga multa.

Sang 2013, ginpasaka sang mga kauturan ang ikaduha nga kaso, ang Religious Community of Jehovah’s Witnesses v. Azerbaijan, sa ECHR kay ginlimitehan sang Azerbaijan ang kadamuon sang literatura nga maorder halin sa iban nga pungsod.

Bisan pa nga wala gihapon narehistro sang gobierno ang mga Saksi ni Jehova sa Ganja, nag-ayoayo na ang kahimtangan. Sining nagligad nga mga tinuig, makamiting na ang mga kauturan sa gamay nga grupo sa ila balay nga wala na ginasamulak sang gobierno. Dugang pa, bisan pa nga ginarebyu gihapon sang gobierno ang mga literatura antes ini makasulod sa Azerbaijan, gintugutan na sini nga makaorder sing bastante nga literatura ang aton mga kauturan.

Si Brother Kiril Stepanov, nga naasayn sa Public Information Desk sang mga Saksi ni Jehova sa Azerbaijan, nagsiling: “Nagalaum kami nga ining importante nga desisyon sang ECHR magapadasig sang proseso sa pagkuha sing rehistro sa Ganja kag sa iban nga siudad sa Azerbaijan. Nagalaum kami nga sa ulihi untatan na sang gobierno ang pagrebyu sang aton mga literatura antes ini makasulod sa pungsod.”

Nagapasalamat kita sa suporta ni Jehova. Ining paborable nga desisyon sang korte dugang nga pamatuod nga ‘wala sing ginhimo nga hinganiban batok sa katawhan sang Dios nga magmadinalag-on.’—Isaias 54:17.