Sang Abril 26, 2021, ang UN Human Rights Committee nagpagua sang isa ka importante nga desisyon sa kaso nga Aziz Aliyev and Others v. Azerbaijan. Ikatlo ini nga desisyon sang Committee pabor sa mga Saksi ni Jehova sa Azerbaijan. Ginasuportahan sini ang aton kinamatarong nga magsimba sing mahidaiton.

Ini nga kaso parte sa ilegal nga pagpang-raid sang mga pulis sa komunidad sang Aliabad sa Zagatala Region. Sang Septiembre 21, 2013, gin-raid sang mga pulis ang balay ni Brother Aziz Aliyev diin nagatipon ang pila ka Saksi ni Jehova para sa miting sang kongregasyon. Ginhalughog nila ang balay kag ginpahog ang aton mga kauturan, ginpanguha ang mga literatura, mga legal nga dokumento, mga rekord sa pagpadoktor, kag kuarta. Dayon gindala sang mga pulis ang tanan nga kauturan sa presinto. Samtang nagapakadto sila sa presinto, ginkuyap si Sister Havva Azizova kag nalipong. Sang makita ini sang mga pulis, napilitan sila nga dal-on sia sa ospital. Pero sang maumpawan na sia, gindala sia gihapon sa presinto para kuestyunon.

Sang ulihi, ang Zagatala District Court nagmando nga multahan ang kalabanan nga kauturan sing 1,500 Azerbaijani Manats ($1,716 U.S. sina nga tion). Ginsuportahan sang Sheki Court of Appeals ining wala sing basihan nga desisyon sang district court. Kag bangod nahimo na sang aton mga kauturan ang tanan para iapelar ini nga kaso sa Azerbaijan, gin-apelar nila ini sa UN Human Rights Committee.

Ang Committee nagdesisyon nga ginlapas sang Azerbaijan ang kinamatarong sang aton mga kauturan sa kahilwayan sa relihion kag ilegal ang ginhimo sang Azerbaijan nga pag-aresto kag pagmulta sa ila. Sa desisyon sang Committee, nagsiling ini nga ang mga Saksi ni Jehova gin-harrass sang mga awtoridad kag sang mga pulis nga “nagpamahog nga prisuhon sila, nag-insulto sang iban sa ila, nagpakalain sang ila relihion, pero wala nagpaathag kon paano nakahalit ukon makahalit sa iban ang ila relihioso nga mga miting ukon ang ila ginagamit nga mga literatura.” Gani, ginmanduan ang Azerbaijan nga dapat bayaran sing danyos ang aton mga kauturan kag dapat “himuon ang tanan para indi na masulit ini nga paglapas sa palaabuton, kag lakip sa sini ang pagrebyu sa mga kasuguan kag mga layi sang pungsod .”

Nalipay kita nga sining nagligad nga mga tinuig, ang aton mga kauturan sa Azerbaijan may kahilwayan nga magsimba kag magtipon, kag wala na sing may nagagamo sa ila. Padayon gid nga napamatud-an ang kamatuoran sa mga korte subong. Ginapasalamatan gid naton ang aton Dios nga si Jehova.—Filipos 1:7.