Sang Septiembre 22, 2022, ginsentensiahan sang Goranboy District Court sa Azerbaijan ang 22 anyos nga si Brother Seymur Mammadov. Mapriso sia sing siam ka bulan kay nangindi sia nga magsoldado bangod sang iya konsiensia. Gin-aresto sia dayon sa korte pagkatapos mabasa ang desisyon. Ini nga desisyon direkta nga paglapas sa duha ka mando sang European Court of Human Rights (ECHR) sa Azerbaijan.

Halin sang 2019, duha ka desisyon ang ginpagua sang ECHR batok sa Azerbaijan. Desisyon ini sa kaso nga Mamedov and Others v. Azerbaijan kag Mekhtiyev and Abilov v. Azerbaijan. Ining duha ka desisyon nagasuporta sa kinamatarong sang mga Saksi ni Jehova nga mangindi nga magsoldado bangod sang ila relihioso nga pagpati. Ini nga kinamatarong base sa Article 9 sang European Convention.

Sa duha ka kaso, gin-aku sang gobierno sang Azerbaijan sa ECHR nga ginlapas sini ang kinamatarong sang aton mga kauturan kag nagsiling ang pungsod nga handa ini nga bayaran ang mga kauturan sang tanan nga danyos. Pero, ginlapas sang gobierno sang Azerbaijan ang kinamatarong ni Brother Mammadov kag nagapakita ini nga ginbalewala gid sang Azerbaijan ang desisyon sang ECHR.

Una nga ginpatawag si Seymur Mammadov sa State Service for Mobilization and Conscription of the Goranboy Region sang Mayo 4, 2022. Ginpaathag niya sa mga opisyal ang iya base sa Biblia nga mga pagpati kag nangabay sang alternative civilian service. Wala ginpasugtan si Seymur sa iya pangabay. Pero nanindugan gid si Brother Seymur.

Subong, si Seymur gina-detain sa siudad sang Ganja. Bisan pa mabudlay ang iya sitwasyon, positibo lang gihapon si Seymur. Nagsiling sia nga nasugid niya ang iya mga ginapatihan sa mga 30 niya ka kaupod sa selda, kag ang iban sa ila nagpakita sang interes sa mensahe sang Biblia.

Ang abogado ni Seymur nag-apelar na. Kabay pa nga ang Ganja Court of Appeals magahimo sang makatarunganon nga desisyon kag paguaon ang aton brother sa prisuhan.

Sigurado gid nga padayon nga buligan ni Jehova si Seymur sa sini nga kabudlayan.—Isaias 43:2.