Sang Disiembre 15, 2020, ang UN Human Rights Committee nagpagua sang duha ka importante nga desisyon pabor sa mga Saksi ni Jehova sa Azerbaijan. Ini nga mga kaso amo ang Rahima Huseynova v. Azerbaijan; kag ang Saladdin Mammadov, Rashad Niftaliyev and Sadagat Abbasova v. Azerbaijan. Sa sining duha ka kaso, ang Committee nagdesisyon nga ginlapas sang Estado ang kinamatarong sang mga Saksi ni Jehova. Nagmando ang Committee nga dapat bag-uhon sang Azerbaijan ang mga kasuguan sini, para indi na malapas liwat ini nga mga kinamatarong.

Ang kaso nga Rahima Huseynova v. Azerbaijan parte sa isa ka insidente nga natabo sang Disiembre 2014. Ginpriso sang mga pulis si Sister Rahima Huseynova bangod ginasugid niya sa iban ang iya ginapatihan. Ginmultahan sia sang district court sing 1,500 Azerbaijani Manats ($882 U.S.), bangod ang mga Saksi ni Jehova wala pa narehistro sa Baku sina nga tion. a Sang nag-apelar si Sister Rahima Huseynova, ginsuportahan sang Baku Court of Appeal ang desisyon sang district court. Bangod sini, ginpasaka ni Sister Huseynova ang iya kaso sa international court.

Ang UN Human Rights Committee nagdesisyon nga ginlapas sang Estado ang Article 18(1) sang International Covenant on Civil and Political Rights (ICCPR). Nagmando ang Committee nga dapat magbayad sing nagakaigo nga danyos ang Azerbaijan. Sa ila ginbalhag nga pahayag ang Committee nagsiling nga ang Azerbaijan “may obligasyon man nga himuon ang tanan nga kinahanglan para indi na masulit ini nga paglapas sa palaabuton, kag nalakip sa sini ang pagrebyu sa mga kasuguan, regulasyon, kag/ukon mga ginapatuman para siguraduhon nga ginaproteksionan nila ang mga kinamatarong base sa article 18 [sang ICCPR].”

Ang Saladdin Mammadov, Rashad Niftaliyev and Sadagat Abbasova v. Azerbaijan parte naman sa isa ka grupo sang mga kauturan sa Ganja nga nagtipon sa balay ni Brother Saladdin Mammadov para magtuon sing Biblia. Sang Oktubre 2014, gin-raid sang mga pulis ini nga pagtinipon kag ginhalughog ang balay, kag ginpanguha ang mga Biblia kag iban pa nga pagkabutang. Gindala sa presinto si Brother Mammadov, si Brother Rashad Niftaliyev, kag si Sister Sadagat Abbasova kag ginpriso sing anom ka oras. Pagligad sang duha ka adlaw, ginpatawag sila sang Ganja City Nizami District Court. Nagdesisyon ang korte nga ilegal ang ila pagtinipon bangod ang ila relihion wala pa narehistro sa Ganja. Ginmultahan sang korte ang kada isa sa ila sing 2,000 Azerbaijani Manats ($1,176 U.S.). Nag-apelar ang mga utod sa Ganja Court of Appeal. Pero, ginsuportahan sang Ganja Court of Appeal ang desisyon sang Ganja City Nizami District Court. Gani, ginpasaka nila ang ila kaso sa UN Human Rights Committee.

Ang Committee nagsiling nga ginlapas sang Azerbaijan ang madamo nga ICCPR article kag dapat sila magbayad sing danyos sa tatlo ka Saksi. Sa ginbalhag nga pahayag sang Committee, nagsiling ini nga “wala ginpaathag sang District Court kon ngaa dapat anay magparehistro ang mga utod sang ila relihion antes sila magtipon sa isa ka pribado nga balay para magsimba.” Ang ila ginsiling nagapakita nga ang aton mga kauturan sa Azerbaijan may kinamatarong nga magtipon para magsimba bisan wala pa narehistro ang ila relihion.

Pareho sa kaso nga Rahima Huseynova, ang Committee nagmando man sa Azerbaijan nga rebyuhon ang ila “mga kasuguan, regulasyon, kag/ukon mga ginapatuman” para masigurado nga maproteksionan nila ang mga kinamatarong base sa ICCPR.

Nagapasalamat gid kita nga sa sining nagligad nga mga tinuig, nagbag-o na ang sitwasyon sa Azerbaijan kag wala na ginasupak sang mga awtoridad ang aton kinamatarong sa pagsimba. Nagalaum kita nga ining duha ka desisyon makabulig nga padayon nga mapabakod ang legal nga pagpamatuod sang maayong balita sa Azerbaijan.—Filipos 1:7.