Sang Nobiembre kag Disiembre 2021, ang United Nations Human Rights Committee (CCPR) nagpapanaug sang duha ka desisyon nga nagasuporta sa kinamatarong sang mga Saksi ni Jehova nga isugid ang ila pagpati sa iban. Ining duha ka kaso iya sang mga sister nga gin-aresto sang mga awtoridad sa Azerbaijan bangod sang pagsugid nila sang mensahe sang Biblia sa iban.

Sang Nobiembre 5, 2021, ginsuportahan sang CCPR ang kinamatarong sa pagbantala ni Sister Matanat Gurbanova kag ni Sister Saadat Muradhasilova. Gin-aresto ining duha ka sister sang may nabaton nga reklamo ang mga awtoridad halin sa wala magpakilala nga indibiduwal sang Nobiembre 2014. Ang kada isa sa ila ginmultahan sing 1,500 Azerbaijani Manats ($880 U.S.). Nagdesisyon ang CCPR nga ilegal ang pag-aresto sa ila kag nagmando ini nga dapat himuon sang Azerbaijan ang tanan para indi na masulit ang amo sini nga klase sang pag-aresto sa palaabuton.

Sanday Matanat kag Saadat, nga mag-utod, nagsiling: “Bisan pa nga ginapahog kami sang mga pulis kag sang judge, nagbakod pa gid ang amon pagtuo bangod sining eksperiensia. Ginpamatud-an liwat ni Jehova nga wala sing makapugong sa iya kag nahibaluan niya kon san-o kag kon paano proteksionan ang iya mga alagad.”

Sa pareho man nga desisyon sang Disiembre 21, 2021, namatbat ang CCPR nga nalapas sang mga pulis sang Azerbaijan ang kasuguan sang gin-detain nila si Sister Jeyran Azizova kag si Sister Gulnaz Israfilova kay “ginhimo nila ang mga hilikuton sang ila relihion sa iban nga lugar.” Sa desisyon sini, gin-athag sang CCPR nga wala sing ilegal nga ginhimo ang mga sister sang nagsugid sila sang ila pagpati sa iban.

Sang Nobiembre 2016, sang nagkadto sa Goranboy Region sa Azerbaijan sanday Jeyran kag Gulnaz para bisitahan ang ila mga abyan, ginsugid nila ang mensahe sang Biblia sa iban. Ang isa ka opisyal nagreklamo sa pulis, kag gin-aresto ang mga sister. Sang gin-hearing sila, gin-akusar sang isa ka judge nga espiya ang mga sister kag ginmultahan sila sing 2,000 Azerbaijani Manats ($1,176 U.S.). Ginsuportahan sang appels court ini nga desisyon. Gani nag-apelar sa CCPR ang mga sister.

Ang mga desisyon sang korte nga pabor sa aton makabulig para hilway naton nga mahimo ang pinakaimportante naton nga hilikuton. Nalipay kita nga nangin maayo nga halimbawa ang aton mga sister kay maisog sila sa pagbantala sang maayong balita.—Mateo 10:18.