Nagdaug sa European Court of Human Rights (ECHR) ang duha ka kaso nga ginpasaka sang mga Saksi ni Jehova parte sa aton kahilwayan sa relihion sa Azerbaijan. Nagalaum kita nga ining desisyon sang ECHR makabulig para mangin mas hilway sa pagsimba ang aton mga kauturan sa pungsod.

Sang Pebrero 20, 2020, gindesisyunan sang Korte ang mga kaso nga Nasirov and Others v. Azerbaijan, nga naka-pending halin pa sang 2010, kag ang kaso nga Religious Community of Jehovah’s Witnesses v. Azerbaijan, nga naka-pending halin pa sang 2009. Sa kaso nga Nasirov, ang korte nagsiling nga ginlapas sang Azerbaijan ang Article 5 kag 9 (Liberty of Person and Freedom of Religion) sang European Convention on Human Rights sang sulitsulit sini nga ginpriso, ginpamatbatan nga guilty, kag ginmultahan ang mga Saksi ni Jehova nga nagbantala sang 2010. Nagdesisyon ang Korte nga ang kada isa sa ila bayaran sing $3,235.80 (EUR 3,000) nga danyos, nga may kabilugan nga $22,650.60 (EUR 21,000). Sa kaso nga Religious Community of Jehovah’s Witnesses, ang korte nagsiling nga ginlapas sang Azerbaijan ang Article 10 (Freedom of Expression) sang Convention sang gindumilian sini ang aton mga kauturan sa pagpasulod sa pungsod sang pila naton ka publikasyon kag pagpanagtag sini.

Si Jason Wise, nga isa sa mga abogado nga nag-uyat sini nga mga kaso, nagsiling: “Tinuig na nga nabudlayan ang mga Saksi ni Jehova sa Azerbaijan sa pagpasulod sa pungsod sang relihioso nga mga literatura kag pagpanagtag sini. Madamo kami sang ginpasaka nga kaso para mapasugtan kami nga magpasulod sang aton literatura. Pero mas madamo pa gid kami sang ginpasaka nga kaso parte sa mga Saksi nga gin-aresto kag ginpriso bangod sang ila pagbantala. Ining desisyon sang ECHR sa sining duha ka kaso importante gid para sa mga Saksi ni Jehova sa Azerbaijan. Sa kaso nga Religious Community of Jehovah’s Witnesses, ang Korte nagsiling nga ang mga literatura sang mga Saksi ni Jehova wala nagahatag sang problema sa iban nga relihion kag wala man ini sang bisan ano nga malain nga epekto sa iban. Sa kaso sang Nasirov, nagdesisyon ang Korte nga ang relihioso nga mga literatura puede mapanagtag sa publiko nga mga lugar sa mga tawo nga indi mga Saksi ni Jehova. Nalipay gid kita nga ginpaboran sang Korte ang kahilwayan sa relihion kag pagpahayag sa Azerbaijan.”

Si Brother Famil Nasirov nagsiling: “Sang una, kabudlay magbantala sa amon pungsod. Pirme lang kami ginadakop sang mga pulis kag ginainterogar sing mga 4 asta 5 ka oras. Pero bangod sang bulig ni Jehova kag mga panikasog sang aton pinalangga nga mga kauturan, wala na ini nagakatabo subong kag hilway na kami sa pagbantala.”

Antes pa sang desisyon sang ECHR, nangin mas hilway na sa pagsimba ang aton mga kauturan sa Azerbaijan. Ginpasugtan na sang gobierno ang aton mga kauturan nga magpasulod sang aton mga literatura sa pungsod kag magpanagtag sini. Sugod sang Enero 2017, wala na ginamultahan ang aton mga kauturan kon magtambong sila sa mga miting. Subong, ginahiwat ang mga miting sa tatlo ka Kingdom Hall sa Baku, kag sa mga balay sa bilog nga pungsod. Sugod sang 2015, nagpasugot na ang State Committee for Work with Religious Associations, ang ahensia sang gobierno nga nagarehistro kag nagadumala sang mga relihion sa Azerbaijan, nga maghiwat ang Religious Community of Jehovah’s Witnesses sang Memoryal sang kamatayon sang Cristo, rehiyonal nga mga kombension, kag mga asembleya sa ginaarkilahan nga mga lugar.

Nagapasalamat gid kita kay Jehova sa sining paborable nga mga desisyon kag sa iya padayon nga pagsuporta sa aton mga kauturan sa Azerbaijan.—Salmo 98:1.