Si Brother Royal Karimov kag si Brother Seymur Mammadov ginpagua sa prisuhan sa Azerbaijan. Ining duha ka brother nangindi nga magsoldado bangod sa konsiensia.

Suno sa report sang nagligad, gin-deny sang isa ka korte sa Azerbaijan ang pangabay ni Seymur nga hatagan sia sang alternative civilian service. Nagdesisyon ang korte nga guilty sia kag ginsentensiahan sia nga mapriso sing siam ka bulan sang Septiembre 22, 2022. Ini nga desisyon naglapas sa duha ka mando sang European Court of Human Rights parte sa Azerbaijan. Nag-apelar ang abogado ni Seymur, kag sang Disiembre 12, 2022, nagdesisyon ang Ganja Court of Appeals nga ang sentensia nga mapriso buslan sang suspended prison sentence. Bisan pa nakagua na si Seymur subong, nagaapelar sia sa Supreme Court sang Azerbaijan nga bag-uhon ining indi patas nga desisyon kag sentensia.

Sang sa prisuhan si Seymur wala sia sang Biblia kag indi sia makabaton sing sulat, pero ginbuligan sia ni Jehova. Sia nagsiling: “Antes sang akon katapusan nga hearing, ginsulat ko sa isa ka papel ang ginasiling sang Josue 1:5, 6, nga nagasiling: ‘Pareho sang pag-upod ko kay Moises. Indi ko gid ikaw pagbayaan ukon pagpabay-an.’” Nagpalig-on gid ini kay Seymur sang gin-aresto sia kag ginpriso. “Ini nga mga bersikulo ang akon daily text,” siling niya.

Sang Mayo 30, 2022, ginpatawag sang mga awtoridad si Royal sa Gadabay Region State Service for Mobilization and Conscription. Nangindi si Royal nga magsoldado bangod sang konsiensia kag nangabay nga hatagan sia sang alternative civilian service. Gin-deny ang iya pangabay. Sang Hulyo 25, 2022, gin-aresto sia sang mga awtoridad sang militar kag ilegal nga ginpriso sa military unit asta sang Nobiembre 1, 2022. Gusto ni Royal nga paimbestigaran sa mga awtoridad ang Gadabay Region State Service for Mobilization and Conscription.

“Sang ginsilingan ako nga indi ako makagua sa military unit, naglalain gid ako,” siling ni Royal. “Pero gindumdom ko nga isa ini ka pagtilaw sa akon pagtuo.”

Sang ginpriso si Royal, ginpasugtan ang iya utod nga babayi nga bisitahan sia. Gani nadal-an niya si Royal sang Biblia, kag nagsiling si Royal nga nakabulig gid ini nga indi magluya ang iya pagtuo. “Kon kis-a nagaluya man ang akon buot. Pero, ginpabakod ako ni Jehova. Ang pagbasa sang Biblia kag ang pagpangamuyo kay Jehova nakahatag gid sa akon sang daku nga kalinong.”

Padayon naton nga ginapangamuyo nga untatan sang mga awtoridad sa Azerbaijan ang pagpriso sa aton mga kauturan nga nangindi nga magsoldado bangod sa konsiensia. Kag kabay nga maghatag ang mga awtoridad sang matuod nga alternative civilian service pareho sang ginahimo sang madamo nga pungsod.—1 Timoteo 2:1, 2.