Sang Enero 7, 2023, gindedikar ni Brother Mark Sanderson, miembro sang Nagadumala nga Hubon, ang isa ka gintukod liwat nga Kingdom Hall sa Great Abaco Island sa Bahamas. Ang una nga Kingdom Hall ginguba sang Bagyo Dorian sang Septiembre 2019. Bangod sa COVID-19 nga pandemic nauntat ang pag-obra sa Kingdom Hall mga tatlo ka semana na lang antes sang iskedyul nga matapos ini sang Marso 2020. Nagbalik ang mga boluntaryo sa konstruksion sang 2021 para tapuson ini nga proyekto.

“Sang nagwaswas ang bagyo, madamo gid nga butang ang napalid, pero wala gid sini napalid ang inyo pagtuo. Kag wala man sini mapalid ang inyo relasyon sa Dios,” siling ni Brother Sanderson sa iya pamulongpulong para sa dedikasyon.

Ining bag-o gintukod nga building makabato sa bagyo kag amo lang ini ang Kingdom Hall sa isla. Ginagamit ini sang 49 ka kauturan sa duha ka kongregasyon, nga ang isa nagahambal sang English kag ang isa sang Haitian Creole. May kadamuon nga 175 ang nag-attend sa dedication program kag may 167 pa nga nag-connect paagi sa video conference. Ang dedication program may open house para sa mga Saksi kag indi Saksi nga nagaistar sa isla.

Si Brother Jake Majure, isa sa mga boluntaryo sa konstruksion sang gin-untat sadto ang pag-obra sa Kingdom Hall. “Nasubuan gid ako,” siling niya. “Ginatapos na namon ang madasig gid nga pagkay-o sa mga balay, kag ginaplano namon nga tapuson ang pagtukod liwat sang Kingdom Hall para makahingabot ini sa Memoryal, pero ginpauntat kami.” Nakabalik sia sang 2021 para magbulig sa pagtapos sang Kingdom Hall kag sa pagkay-o sa iban nga mga balay.

Si Brother Sanderson nagsiling: “Ginapakita gid sini nga Kingdom Hall nga kita nga katawhan ni Jehova nagabuligay kag nagapalanggaanay. Kanami gid kag makalilipay nga ari ako diri subong nga Enero 2023 kag makita ang human na nga building kag ang kalipay sang mga kauturan.”

Nagasalig kita nga ining gintukod liwat nga Kingdom Hall magaresulta sa pagdayaw sa aton Dios nga si Jehova.—Esdras 3:10.