NEW YORK—Masugod ang tuigan nga mga kombension sang mga Saksi ni Jehova sa Biernes, Mayo 18, 2018. Ang tema sa sini nga tuig, “Magpakaisog!” Antes sang mga kombension, ang mga Saksi sa bilog nga kalibutan manghatag sa publiko sing imbitasyon nga magtambong sa wala sing bayad nga programa. Ang mga kombension hiwaton sa 180 ka kadutaan.

Ang tatlo ka adlaw nga programa may 54 ka presentasyon kag lakip sa sini ang mga pamulongpulong, audio drama, mga interbyu, kag malip-ot nga mga video. Dugang pa, ang video drama nga natig-uluhan Ang Sugilanon ni Jonas—Isa ka Leksion sang Kaisog kag Kaluoy ipatan-aw sa katapusan nga adlaw sang kombension. Kada adlaw, ang mga programa sa aga kag sa hapon magasugod paagi sa pagpagua sang mga music video nga ginhimo para gid sa kombension.

Si David A. Semonian, ang humalambal para sa mga Saksi ni Jehova nagsiling: “Kon magtan-aw ka sing balita, makita mo nga nagadugang pa gid ang stress kag kahadlok sang mga tawo subong bisan ano man ang ila edad. Kinahanglan sing kaisog para maatubang ini. Ginaabiabi namon ang tanan nga magtambong sa kombension sa sini nga tuig para makabenepisyo sa mapuslanon nga laygay sang Biblia.”

Ang petsa kag mga lugar nga hiwatan sang kombension makita sa opisyal nga website sang mga Saksi nga jw.org.

Media Contact:

David A. Semonian, Office of Public Information, +1-845-524-3000