Para sa aton nga mga Saksi ni Jehova, ang Nobiembre 2020, isa gid ka pinasahi nga bulan sa aton kasaysayan. Bangod sa pandemic nga nagpatay sa madamo nga tawo, ang kalabanan sa aton indi makahalin sa balay. Gin-untatan anay naton ang aton naandan nga paagi sa pagbantala. Pero bisan amo sina ang sitwasyon, ang katawhan ni Jehova nangin madinalag-on gid sa ila kampanya para ibantala ang Ginharian sang Dios sa bilog nga kalibutan. Minilyon ka kauturan sa bilog nga kalibutan ang nagpangabudlay gid para mapanagtag ang Lalantawan Num. 2 2020. Ginpanagtag nila ini sa mga negosyante, opisyal sang gobierno, kag sa mga manunudlo, pati man sa ila mga abyan, paryente, kag sa kay bisan sin-o. Madamo gid sang natun-an sa sini ang mga nagbaton. Ang tanan nga nagpakigbahin sa sini nga kampanya, nalipay gid kag napalig-on.

Ari ang pila ka eksperiensia kag komento sang pila naton ka kauturan halin sa bilog nga kalibutan.

Ang 18 anyos nga si Lucinda Furkin nga taga-Australia, bag-o lang nabawtismuhan. Nagsiling sia: “Nagmasakit ako sing grabe sina gid nga bulan sang kampanya. Pero nabatyagan ko gid nga ginpabakod ako ni Jehova, nga daw ginauyatan niya ako sa kamot, kag ginhatagan niya ako sing kusog nga makabatas.”

Ginsugid sang isa ka amay sa New Zealand kon paano nakabulig ang kampanya sa ila pamilya: “May apat kami ka bata nga babayi nga nagaedad sing 7, 9, 11, kag 13. Para sa amon ining bilog kalibutan nga kampanya asaynment namon halin sa aton mahigugmaon nga Amay nga si Jehova. Nakabulig ini sa amon nga padayon nga magbantala kada adlaw sa panahon sang kampanya.”

Si Kagiso kag si Lydia Marumo, nga nagaalagad sa sirkito, nagpadala sing elektroniko nga mga kopya sang magasin sa ila mga paryente nga indi Saksi. May pila nga nagpasalamat sa ila. Ang isa sa paryente ni Kagiso, nga isa ka doktor, nagsiling nga tayming gid ang magasin kay ang iban niya nga pasyente madamo sing pamangkot parte sa Dios kag sa Biblia. Nagsiling man sia nga ang iya kabataan nanamian sa espiritismo. Ginkontak sia dayon sang mag-asawa kag nakasugod sila sing Bible study sina mismo nga gab-i. Subong, naga-Bible study sila sing duha ka beses kada semana.

Si Soroya Thompson, nga isa ka payunir nga sister sa Ontario, nagsulat: “Nabuligan ako sang kampanya nga magpokus liwat sa kon ano ang pinakaimportante kag kon daw ano pa ka daku nga hilikuton ang dapat himuon. Nagpahanumdom man ini sa akon sang gugma ni Jehova kag pamatuod ini nga indi gid niya gusto nga may bisan isa nga malaglag. Pirme ko gid ina ginapamalandungan, gani nagpalig-on ini sa akon nga himuon pa gid ang akon pinakamasarangan sa sini nga kampanya.”

Ang isa ka sister sa British Columbia nagsiling: “Sa sining makapa-stress nga tion, nag-auxiliary payunir ako. Nakabulig ini sa akon nga indi ako ma-depress kag para magnami ang akon pamatyag. Nakabulig man ini sa akon pamilya.”

Ang branch sa Canada nag-report nga ini nga kampanya nakabulig man para magsuod pa gid ang mga pamilya. Nabatyagan man sang mga bata nga may mabulig sila kay puede sila makahimo sing simple nga mga sulat. Makabulig man sila sa pagbutang sing adres sa mga sobre, sa pagpatapik sang mga stamp, kag sa pagpangita sang mga adres.

Si Brother kag Sister Tuomisto, nga nagaalagad sa sirkito, nagsiling: “Ang Nobiembre amo ang pinakamadulom nga bulan sang tuig diri sa amon lugar. Gani ang mga kauturan, ilabi na ang mga payunir, nalipay gid sa sini nga kampanya kay nakabulig ini sa ila nga indi ma-depress.”

Ginpadal-an sang magasin sang isa ka mag-asawa ang isa nila ka kilala. Nagsulat ini sa ila para magpasalamat: “Subong, [ginabasa ko ang libro sa Biblia] nga Santiago. Nagasiling ini nga ang pagtuo nga wala sing binuhatan patay. Ginatinguhaan gid pirme sang mga Saksi ni Jehova nga maistorya ang mga tawo para ipaathag kag itudlo ang Biblia. Ang ila mga ginahimo nagapabakod sang pagtuo.”

Ang branch sa Greece nagsiling: “Madamo ang ginakapoy na kag gina-stress bangod sa ginapatuman nga mga restriksion kag lockdown. Ini nga kampanya kinahanglan gid nila. Madamo ang nagsiling nga ini nga kampanya nakabulig sa ila kay may bag-o naman sila nga himuon, kag napalig-on gid sila sa sini.”

Mabudlay gid ang sitwasyon ni Sister Suzie Kontargiri kay may balatian sia kag ang iya bana indi Saksi ni Jehova. Pero bisan pa amo sini ang iya sitwasyon, nag-auxiliary payunir sia. Nagsiling sia: “Bangod sa kampanya, wala na ako gina-depress. Kanami sang bugtaw ko kada aga, himuon ko ang mga ulubrahon sa balay, maluto, ihanda ang mga kinahanglanon sang akon bana, kag dayon mabantala na. Kag bangod naanad na ang akon indi Saksi nga bana nga makita nga nalipay ako kon nagabantala upod sa mga sister, pirme sia nagapamangkot: ‘May preaching kamo subong?’”

Si Sister Tamaki Hirota nagsulat sa mga opisyal sang gobierno. Nagsiling sia: “Si Jehova ang una nga nagpanaksi paagi sa mga sulat. Naghimo sia sing 66 ka sulat para sa mga tawo, nga sulitsulit nila nga ginabasa sa madamo na nga tinuig. Nakabulig ini sa madamo nga tawo nga mangin suod kay Jehova. Kabalo si Jehova nga epektibo gid ini nga paagi. Ini nga kampanya, indi ko gid malipatan nga hitabo.”

Si Sister Meharaja Vijaya kag Sister Imayanathan Amutha indi hungod nga ginsilingan nga magsulat sa pareho nga adres. Ginhaboy sang ila ginpadal-an ang una nga sulat nga wala pa niya nabuksan. Sang nakita niya ang ikaduha nga sulat, nagsiling sia nga siguro importante gid ang ginaunod sini nga sulat kay kaduha gid ginpadala. Ginbasa niya ang magasin, gintawgan ang sister nga nagpadala sang ikaduha nga sulat, kag nagpasugot sia nga mag-Bible study.

Sang nabaton sang isa ka opisyal sang gobierno ang magasin, nagtawag sia dayon sa branch sa Sri Lanka. Nagsiling sia nga wala pa gid sia sing may naistorya nga Saksi ni Jehova bisan pa isa sia ka Cristiano. Nanamian gid sia sang magasin kag sang aton website. Gani namangkot sia: “Ano ang himuon ko para mangin isa sa mga Saksi ni Jehova?” Nag-iskedyul dayon ang mga utod para maistorya sia liwat.

Sa eskwelahan sang isa ka 13 anyos nga utod, pirme ginaistoryahan ang pulitika kag ang kampanya sang Nobiembre nakabulig gid sa iya. Nagsiling sia: “Bal-an ko na kon paano ipaathag sa akon maestra ukon maestro kon ngaa wala ako nagaentra sa pulitika. Nakabulig ini sa akon nga magbakod pa gid ang akon pagtuo.”

Pareho man sini ang nabatyagan ni Sister Margit Haring. Nagsulat sia: “Nakabulig sa akon ang kampanya nga mangin maisog kag mapisan. Sang primero, bisan ang pagpamensar ko pa lang nga maistorya ako sa mga negosyante kag mga opisyal sang gobierno, ginakulbaan na ako. Natun-an ko nga mangin mainayuhon sa pagpaathag sang akon pagpati. Makabulig gid ini sa akon sa ulihi.”

Ang isa ka gulang nagsiling: “Napalig-on gid ako sa mga utod nga nagpayunir bisan pa may mga ginabatyag sila sa panglawas. Puede sila tani magrason nga indi lang sila magpayunir. Pero gusto gid nila nga may himuon sila sa tion sang kampanya. Nalipay gid sila kag nagapasalamat kay Jehova kag sa mga kauturan. Kon mabatian sang mga kauturan ang ila eksperiensia kag ang kalipay nga ila nabatyagan, nagahibi sila.”

Indi lang amo sini ang eksperiensia kag komento sang mga kauturan sa bilog nga kalibutan, kundi madamo pa. Isa gid ka kalipay nga masugiran ang minilyon ka tawo sang mensahe sang Ginharian.—Juan 15:11.