Sa mga bulan sang Hulyo kag Agosto 2020, minilyon ka mga kauturan naton kag interesado nga mga tawo ang nahiusa nga nagtan-aw sang programa sang kombension para sa 2020.

Ining ginakalangkagan gid nga ‘Magkasadya Pirme’! nga Kombension ginplano nga hiwaton sa mga Assembly Hall, arena, convention center, kag mga stadium sa 240 ka kadutaan. Pero para maproteksionan ang ikaayong lawas sang mga magatambong, nagdesisyon ang Nagadumala nga Hubon nga hiwaton ining rehiyonal nga mga kombension paagi sa videoconference. Amo ini ang una nga tion sugod sang 1897, nga ang organisasyon wala nakahiwat sang live nga kombension.

Si Kenneth Cook, Jr., nga miembro sang Nagadumala nga Hubon, nagsiling: “Sang gin-cancel ang rehiyonal nga mga kombension, ang tulumuron namon amo nga makahiwat sang isa ka okasyon nga puede tambungan sang tanan sa bilog nga kalibutan, sa pareho nga mga binulan. Kabalo kami nga ang programa dapat mahanda sa ginatos ka lenguahe nga indi maglampas sa apat ka bulan. Sa normal nga sitwasyon, ini nga proyekto ginaplano kag ginatapos himo sa sulod sang isa ka tuig ukon sobra pa. Grabe gid ang amon kalipay sang ang una nga bahin sang programa puede na matigayon sa mga 400 ka lenguahe sang Hulyo 6, 2020. Ginapaabot namon nga makalab-ot pa gid ini sa 511 ka lenguahe!”

Parte sa mga benepisyo sini nga kombension paagi sa videoconference, ang isa sa aton mga sister nga nagasolo nga iloy kag may tatlo ka kabataan nagsiling: “Bisan pa nga nahidlaw kami nga makaupod ang mga kauturan, nag-enjoy man ang mga bata ko. Wala namon gintingob tan-aw ang programa, gani mas makapokus sila. Kon gusto nila magpahuway, gina-pause anay namon ini. Gani natan-aw gid namon ang tanan nga bahin sang programa. Ginpadaku sa Biernes nga sesyon nga ang mga anak daw mga baslay nga dapat ipuntariya para mangin malipayon sila sa pag-alagad kay Jehova. Nahimo ko ina bangod sa sini nga klase sang kombension.”—Salmo 127:4.

Ining pinasahi gid nga kombension paagi sa videoconference nag-agaw gid sang atension sang media. Halimbawa, si Robert Hendriks, nga nagadumala sang mga hilikuton sang Public Information Desk sa United States, nagsiling: “Madamo nga journalist ang nagsulat sang mga istorya parte sa sini nga kombension. Ginpaathag nila nga gingamit sang aton organisasyon ang teknolohiya para makahiwat sing kombension paagi sa videoconference kag maproteksionan ang ikaayong lawas sang tanan.”

Ang 2020 “Magkasadya Pirme”! nga Kombension, isa naman sa bag-o nga mga paagi diin nakita naton nga si Jehova nagapanghikot gid bilang aton Daku nga Instruktor.—Isaias 30:20.