Nangin espesyal gid ang 2020 nga Memoryal sang kamatayon sang Cristo. Sa una nga tion, ang programa sang Memoryal gin-broadcast sa mga estasyon sang TV kag radyo sa sarisari nga lenguahe sa madamo nga lugar sa bilog nga Africa.

Bilang resulta sini nga broadcast, sobra 407,000 ka manugbantala ang nakatan-aw sang programa sang Memoryal, wala labot sa indi maisip nga kadamuon sang interesado nga mga tawo nga nagtan-aw man sini. Wala nabal-an ang total nga kadamuon sang nagtan-aw sini, pero ang programa gin-broadcast sa mga lugar nga sobra 150 ka milyon ka tawo ang nagaistar.

Ang kalabanan sa bilog nga kalibutan nag-tie in sa Memoryal paagi sa videoconference bangod sang COVID-19 nga pandemic. Pero sa Africa, madamo nga manugbantala ang nagaistar sa mga lugar nga mahal gid ang Internet kag pagtawag sa cellphone gani indi sila maka-stream ukon maka-download sang mga video. Bangod sini, gintugutan sang Nagadumala nga Hubon ang pila ka branch nga magnegosyar sang kontrata sa lokal kag nasyonal nga mga estasyon sang TV kag radyo sa tamatama lang nga presyo, para ma-broadcast ang programa sang Memoryal.

Antes sang Memoryal, 11 ka branch—Angola, Benin, Cameroon, Côte d’Ivoire, Democratic Republic of the Congo, Ghana, Malawi, Mozambique, Senegal, Zambia, kag Zimbabwe—ang nagnegosyar sa mga broadcasting company para ma-broadcast ang pamulongpulong sa Memoryal sa sobra 36 ka mga lugar sa 16 ka pungsod.

Angola

Anom ka estasyon sang radyo ang nagsugot nga i-broadcast ang programa sang Memoryal sa anom ka lenguahe: Ibinda, Kikongo, Kimbundu, Nyaneka, Portuguese, kag Umbundu. Ini nga mga estasyon mabatian sa mga bahin sang pungsod nga madamo gid ang nagaistar.

Democratic Republic of the Congo

Isa ka babayi nga nagatuon sang Biblia ang nagplano nga magtan-aw sang Memoryal. Abi niya sia lang isa ang matan-aw kay ang iya pamilya nagapamatok sa mga Saksi ni Jehova. Pero samtang nagahimos sia, gintawag sia sang iya tatay sa salas, “Nagasugod na!” Pagkadto niya sa salas, nakibot sia kay ang bilog niya nga pamilya nagatan-aw sang programa sang Memoryal sa TV. Pulo tanan sa pamilya sining babayi ang nagtan-aw sang Memoryal.

Sa isa ka baryo malapit sa Luena, ang isa ka tawo nga indi Saksi nagsiling: “Wala gid sang ginhimo ang amon mga pastor. Pero kamo ’ya, padayon nga nagasimba sa inyo Dios bisan pa may COVID-19 nga pandemic. Maupod na lang kami sa inyo!”

Ghana

Ang isa ka nasyonal nga estasyon sang TV nagsugot nga i-broadcast ang programa sang Memoryal sa lenguahe nga Twi. Nagpagua pa ining estasyon sang pasayod nga nagaagda sa publiko nga tan-awon ang Memoryal. Indi lang ang programa sang Memoryal ang gin-broadcast sini nga estasyon. Ginpagua man sini ang mga video nga Ngaa Napatay si Jesus? kag Ngaa Ginapasugtan sang Dios ang Pag-antos?, kag ang mga music video nga Sa Bag-o nga Duta kag Dali Na Lang Katama.

Senegal

Ang isa ka sister nagsiling: “Ang mga tawo nakatuon parte kay Jehova sa TV kag sa radyo. Daw indi mapatihan! Nalipay gid kami. Amo ina ang amon Dios, si Jehova!”

Ang isa pa ka sister nagsiling: “Sang nabal-an ko nga i-broadcast ang Memoryal, siling ko, ‘Wala kami nakapanagtag sang mga imbitasyon bangod sang COVID-19. Pero bangod ma-broadcast ini sa TV, madamo gihapon nga tawo ang makatan-aw sini.’ Gani ginpangtawgan ko dayon ang akon mga Bible study, mga return visit, kag ang tanan ko nga kilala nga indi mga Saksi para sugiran sila parte sa broadcast. Siam sa akon mga Bible study upod sa ila mga pamilya ang nakatan-aw sang pamulongpulong. Ang isa ko ka pakaisa nga nakatan-aw sang programa sa TV sa Ziguinchor namangkot sa akon kon puede namon maistoryahan pa gid ang parte sa programa. Malipayon ako nga nagsugot.”

Ining espesyal nga kahimusan dugang pa nga pamatuod nga para kay Jehova, “ang tanan nga butang posible.”—Mateo 19:26.