Mabudlay gid para sa mga kauturan nga ara sa mga ospital ukon nursing home ang pagselebrar sang Memoryal bangod sa COVID-19. Kalabanan sa ila indi makagua kag indi man sila puede bisitahan. Pero bisan amo sini ang sitwasyon, ginbuligan sila sang mga gulang nga maselebrar ang pinakaimportante nga okasyon sang tuig.

Sa Naju City, si Sister Lee Jeom-soon nga 91 anyos kag si Sister Kwon Ae-soon nga 88 anyos, upod sa 96 anyos nga interesado nga babayi, determinado gid nga iselebrar ang Memoryal. Ang isa sa mga doktor sa ila nursing home isa sa mga Saksi ni Jehova. Pagkatapos niya maselebrar ang Memoryal sa iya balay upod sa iya kongregasyon, nagbalik sia sa nursing home. Dayon ginbuligan niya ining duha ka sister kag ang interesado nga babayi nga ma-stream ang programa sang Memoryal sa jw.org. Gindal-an man niya sila sang mga emblema.

Sa Uijeongbu City, si Brother Choi Jae-cheol nagaobra sa isa ka nursing home nga may nagaistar nga 14 ka tigulang nga kauturan. Bisan may pandemic, nabuligan sang aton brother ining tigulang nga mga kauturan, upod ang mga interesado, nga maselebrar ang Memoryal paagi sa pag-video stream sang programa. Pila sa mga interesado nga nagtambong ang nagsugod sa pagtuon sa Biblia.

Si Sister Kim Tae-sun nga 59 anyos nagaistar sa Cheonan. Lima ka tuig na sia nga may kanser. Gindala sia sa ospital bangod sang grabe nga kasakit nga iya ginabatyag. Upod niya sa kuarto sa ospital ang isa pa gid ka sister nga si Kim Jeong-mi nga 69 anyos kag may kanser man. Indi sila nga duha makagua sa ospital bangod sang pandemic. Pero ginbuligan sila sang ila mga gulang nga makatambong sa Memoryal kag makaupod sa ila kongregasyon paagi sa videoconference.

Ginpasalamatan sining duha ka sister ang ila mga gulang paagi sa sulat. Nagsiling sila: “Salamat gid sa pagbulig sa amon nga makatambong sa Memoryal kag makaupod ang mga kauturan bisan pa may COVID-19 kag nagamasakit kami.”

Si Sister Mieko Fujiwara nga 70 anyos nga nagaistar sa Mie Prefecture, Japan, naospital. Wala sang Wi-Fi Internet sa ospital, gani indi sia makakonek sa Memoryal sang iya kongregasyon paagi sa videoconference. Pero antes sang Memoryal, ginpasa sang isa ka gulang kag sang asawa sini ang video sang pamulongpulong sa Memoryal sa iya cellphone, amo nga naselebrar niya ang Memoryal bisan ara sia sa ospital.

Sa Zama City, sa Kanagawa Prefecture, ang 102 anyos nga si Sister Yuki Takeuchi nagaistar sa isa ka nursing home. Antes sang Memoryal, ginpadal-an sia sang iya bata kag umagad sang tinapay kag alak. Dayon ginselebrar niya ang Memoryal upod sa ila paagi sa telepono.

Ang iya umagad nga si Brother Mimura nagsiling: “Ang akon ugangan nabawtismuhan sang 1954 kag wala gid sia kaagi nga wala katambong sa Memoryal. Bisan pa indi ini kinaandan nga Memoryal, nalipay gid sia kay nakatambong sia sini nga tuig.”

Sigurado kita nga natalupangdan gid ni Jehova ang mga panikasog sining tigulang ukon may balatian nga mga manugbantala para maselebrar ang Memoryal sa bulig sang ila mga gulang.—Hebreo 6:10.