Samtang padayon nga nagalapta ang COVID-19 nga pandemic sa bilog nga kalibutan, ang mga Saksi ni Jehova nangin mas masako man sa ila hilikuton sa tion sang Memoryal. Nagresulta ini sa pagdamo sang mga nagbisita sa jw.org nga website para mangita sang paumpaw kag impormasyon halin sa Biblia, kag mga balita. Sang Marso, ang kadamuon sang mga nagbisita sa website nagdugang sing sobra 50 porsiento sangsa nagligad nga bulan kag narekord ang pinakamataas nga kadamuon sang mga nangabay sing pagtuon sa Biblia.

Sang nagsugod ang pandemic, amat-amat man nga nagadamo ang mga nagabista sa jw.org. Sang Pebrero, mga duha ka milyon ang nagabisita sa website kada adlaw, nga amo ang kinaandan nga kadamuon. Sang Marso, naglab-ot sa sobra tatlo ka milyon ang kadamuon sang mga nagabista sa website kada adlaw. Pero sang mga adlaw nga may ginpagua nga mga special news update parte sa coronavirus, naglab-ot sa sobra apat ka milyon kag tunga ang nagbisita sa website. Sang Abril 7, ang adlaw sang 2020 nga Memoryal, may sobra pito ka milyon nga nagbisita sa website, kag kalabanan sa sini nagtan-aw sang special morning worship program kag pamulongpulong sa Memoryal.

“Sa sining tion sang tuig, madamo ang nagakadto sa jw.org para mabal-an kon san-o ang Memoryal kag kon diin puede magtambong,” siling ni Brother Clive Martin, nga nagadumala sang MEPS Programming Department sa world headquarters sang mga Saksi ni Jehova sa Warwick, New York. “Subong nga tuig, madamo nga interesado ang indi makatipon upod sa mga kongregasyon, gani ginbutang namon sa website ang 2020 nga pinasahi nga pamulongpulong kag ang pamulongpulong sa Memoryal sa sobra 500 ka lenguahe. Ini nga mga programa gintan-aw ukon gin-download sing minilyon ka beses. Ang kadamuon sang mga nagbisita sa website sining tion sang krisis nagapakita kon daw ano ka importante ang jw.org sa paghatag sang paumpaw kag instruksion halin sa Biblia indi lang para sa mga Saksi ni Jehova kundi sa iban man nga tawo.”

Indi katingalahan nga madamo sa mga nagabisita sa website ang nagapangita sang impormasyon parte sa ikaayong lawas kag kon paano makalikaw sa balatian, pati man sang mga topiko parte sa stress kag kabalaka. Grabe man ang pagdamo sang nagapangita sa website sing dugang nga impormasyon sa Biblia parte sa tanda sang katapusan nga mga adlaw kag sa apat ka manugkabayo nga mabasa sa Bugna kapitulo 6.

Talalupangdon man ang pagdamo sang mga nagapangabay nga magtuon sa Biblia, nga sa kinaandan nagadamo lang sing mga 250 kada adlaw. Pero sang bulan sang Marso, nagdugang ini sing mga 40 porsiento, nga buot silingon mga 350 ka tawo kada adlaw ukon halos 11,000 sina nga bulan. Sa sulod sang 48 ka oras halin sang adlaw sang Memoryal asta sa masunod nga adlaw, sobra 1,000 ka tawo ang nangabay sing pagtuon sa Biblia sa jw.org.

Si Jesus nagsiling nga malipayon ang mga tawo nga mahunahunaon sa ila espirituwal nga kinahanglanon. (Mateo 5:3) Nalipay kita nga madamo ang nagapalapit kay Jehova kag sa iya organisasyon para sa paumpaw kag bulig sa sining panahon sang krisis.—2 Corinto 1:3, 4.