Sang Abril 7, 2020, bisan pa may coronavirus nga pandemic, ginselebrar sang mga Saksi ni Jehova sa bilog nga kalibutan ang Memoryal sang kamatayon ni Jesucristo. Si Brother Stephen Lett sang Nagadumala nga Hubon nagsiling: “Wala sing virus, ukon pandemic sa kalibutan ang makadula sang aton apresasyon sa ginhimo ni Jehova kag ni Jesus para sa aton ukon makapaluya sang aton determinasyon nga saulugon ang Panihapon sang Ginuo.” Paano ini napamatud-an subong nga tuig?

Amo ini ang una sa sunodsunod nga mga artikulo sa aton Newsroom nga magareport kon paano ginselebrar sang aton mga kauturan sa bilog nga kalibutan ang Memoryal bisan pa sang coronavirus nga pandemic. Sa sining una nga artikulo, hibaluon naton kon paano ginselebrar ang Memoryal sa world headquarters sang mga Saksi ni Jehova kag sa branch sa United States.

Bilang pagsunod sa sugo sang gobierno nga indi magtipon ang madamo nga tawo, nagdesisyon ang Nagadumala nga Hubon nga may isa lang ka programa sang Memoryal para sa tanan nga miembro sang pamilya Bethel. Ang speaker, nga si Brother Anthony Morris, naghatag sang iya pamulongpulong sa awditoryum sa Warwick. Ang tanan nga miembro sang pamilya Bethel sa United States makatan-aw sang programa sa ila mga kuarto. Bisan gamay lang ang nagkaon kag nag-inom sang mga emblema, ang Bethel Office naghanda sang mga emblema para sa tanan nga miembro sang pamilya.

Ang mga Bethelite puede man maka-Memoryal sa ila mga kongregasyon paagi sa videoconference. Dugang pa, ang mga Bethelite nga gulang mahimo man maghatag sang pamulongpulong para sa Memoryal paagi sa videoconference.

Madamo sa pamilya Bethel ang nagkomento nga ini nga Memoryal amo ang isa sa pinakaespesyal gid nga natambungan nila. Bisan wala nila nakaupod sa personal ang ila kauturan, nabatyagan nila nga nahiusa sila sa pagselebrar sang duha ka pinakadaku nga ekspresyon sang gugma nga ginhimo sang aton Dios nga si Jehova kag sang iya pinalangga nga Anak nga si Jesucristo.—Juan 3:16; Mateo 20:28.