Sang Agosto 13, 2023, gin-release ni Brother Roy Zeeman, miembro sang Branch Committee sa Suriname, ang libro sa Biblia nga Mateo, Marcos, Lucas, kag Juan sa Aukan nga lenguahe. May 2,713 nga nag-attend sa espesyal nga miting nga ginhiwat sa Assembly Hall of Jehovah’s Witnesses sa siudad sang Paramaribo, Suriname. May ara man sang 691 nga nagtan-aw sang programa paagi sa live stream sa Kingdom Hall sa Cayenne, French Guiana, kag sa iban pa nga lokasyon. Available na dayon sa digital nga pormat ang apat ka Ebanghelyo. Dugang pa, nangin available man ang naimprinta nga kopya sang The Bible—The Good News According to Matthew. Ang nabilin nga tatlo ka Ebanghelyo, iimprinta kon ang bilog nga Bag-ong Kalibutan nga Badbad Sang Cristianong Griegong Kasulatan i-release sa Aukan nga lenguahe.

Ang Aukan isa ka creole nga lenguahe nga ginahambal sang mga tawo nga nagaistar sa Suriname kag sa tupad sini nga French Guiana. Isa ini ka lenguahe nga ginahambal lang kag halos wala sang sinulat nga mga materyal. Ang mga kauturan sa mga kongregasyon nga nagahambal sang Aukan, nagagamit subong sang Bag-ong Kalibutan nga Badbad sa Sranantongo para sa mga miting kag sa ministeryo. Bisan pa ginahambal man sang madamo nga tawo sa Suriname ang Sranantongo, madamo nga mga tawo nga nagahambal sang Aukan ang indi sagad maghambal sang Sranantongo. Sa masami, kinahanglan pa i-translate sang mga kauturan ang mga teksto sa Biblia sa Aukan nga lenguahe kon nagaministeryo sila. Ang isa ka translator nagsiling: “Excited gid kami sa sining bag-o nga release nga magabulig sa mga tawo nga nagahambal sang Aukan. Makabenepisyo gid sila sa Pulong sang Dios bisan ano man ang ila edad kag ineskwelahan.”

Nagasalig kita upod sa aton mga kauturan nga nagahambal sang Aukan nga ining bag-o gin-release nga Biblia makabulig gid sa sinsero nga mga tawo para dayawon si Jehova.—Salmo 34:1.