Ang Lagergemeinschaft Dachau, isa ka asosasyon nga ginhimo sang mga nakaluwas sa concentration camp sa Dachau. Nagapanawagan ini sa mga awtoridad sang Russia nga untatan na ang paghingabot sa mga Saksi ni Jehova. Ginkondenar man sini ang naorganisar sing maayo nga pagmaltrato sang Russia sa aton mga kauturan, sa isa ka open letter nga ginpadala nila kay President Vladimir Putin sang Mayo 16, 2021.

“Kada adlaw, may report gid parte sa paghingabot sang gobierno sa mga Saksi ni Jehova,” siling sa sulat. “Gina-raid kag ginahalughog sang mga Russian secret service, FSB, kag sang mga pulis ang mga balay sang mga tawo nga bahin sini nga relihion. Ginakastigo man sila kag ginamaltrato. Ang mga lalaki kag mga babayi ginasentensiahan sang malawig nga pagkapriso. Kag gina-deny pirme ang mga pangabay para sa parole ukon sa mas maayoayo nga sitwasyon sa prisuhan.”

Ang katapusan nga bahin sang sulat nagsiling: “Ginapangabay ka namon nga ihatag sa kada pumuluyo sang Russian Federation ang iya kinamatarong nga magsimba sing hilway base sa konstitusyon. Palihug tapusa na ini nga inhustisya!”

Suno sa report sang Mayo 2021, may 61 pa ka Saksi nga napriso sa Russia bangod sa ila pagtuo. Lakip sa ila ang mga tigulang, pareho kay Sister Valentina Baranovskaya nga 70 anyos na. Ginsentensiahan sia nga mapriso sing duha ka tuig, kag ara subong sa prisuhan. Na-stroke sia sang Hulyo 2020. Sang Mayo 24, 2021, gin-deny sang korte ang pag-apelar niya kag sang iya bata nga si Roman Baranovskiy, nga ginsentensiahan man nga mapriso sing anom ka tuig.

Ginapasalamatan gid naton ining mga tawo nga nagapanawagan nga untaton na ang inhustisya nga ginahimo sa aton mga kauturan sa Russia. Kabalo kita nga sa ulihi, luwason gid ni Jehova ang iya katawhan.—Daniel 12:1.