Bisan pa ginahimo gid sang katawhan ni Jehova ang tanan nila nga masarangan para indi malatnan sang coronavirus, may mga kauturan gihapon kita nga napatay bangod sini nga virus. (Manugwali 9:11) Makapasubo nga 872 na ka kauturan naton sa bilog nga kalibutan ang napatay bangod nalatnan sila sang COVID-19 nga virus. Ang ila nagakalisod nga mga pamilya gilayon nga ginsuportahan kag ginpaumpawan sang aton mga kauturan. (1 Corinto 12:26) Pero ang pinakaimportante, nagasalig kita tanan kay Jehova, nga nagatuman gid sang iya promisa sa Filipos 4:7 nga hatagan kita sang “paghidait sang Dios.”

Isa sa mga nakaeksperiensia sang pagsuporta sang organisasyon ni Jehova amo si Sister Hannchen Unnützer, nga isa ka espesyal nga payunir sa Bolzano, sa naaminhan sang Italy. Makapasubo nga sang Marso 28, 2020, napatay ang iya bana nga si Brother Manfred Unnützer bangod sang coronavirus. Si Brother Unnützer halos 58 na ka tuig sa pinasahi nga bug-os tion nga pag-alagad, kag ang iya asawa nag-alagad kaupod niya sing halos 54 ka tuig. Updanay sila nga nag-alagad sa sirkito sa sulod sang 25 ka tuig. Halos 1,000 ka kauturan halin sa madamo nga pungsod ang nagtan-aw sang diskurso sa lubong paagi sa videoconference.

Si Sister Unnützer nagsiling: “Ginapasalamatan ko gid ang mga kauturan. Wala gid nila ako ginbayaan. Ara gid sila pirme. Nabatyagan ko gid ang ‘pagbaha’ sang pagpalangga! Ginpalig-on nila ako, ginpaumpawan, kag gin-atipan ang akon mga kinahanglanon. Palangga ko gid sila tanan.”

Nabatyagan man sang mag-asawa nga sanday Maria Jose Moncada kag Darwin Moncada ang pagsuporta sang mga kauturan sa ila kalisod. Nagaalagad sila sa mga lugar nga nagahambal sang Quichua sa kabukiran sang Ecuador. Makapasubo nga ang mga ginikanan ni Sister Moncada—si Sister Fabiola Santana Jordan, nga 56 anyos kag isa ka regular nga payunir, kag si Brother Ricardo Jordan, nga 60 anyos kag isa ka ministeryal nga alagad sa Praderas Congregation sa Guayaquil—sundanay nga napatay sa sulod lang sang anom ka adlaw bangod sang virus. Nagmasakit man bangod sang COVID-19 nga virus ang duha ka utod nga lalaki ni Sister Moncada, pero maayo lang kay nag-ayo na sila.

Grabe gid ang kalisod ni Sister Moncada, gani gusto niya magbiyahe sing apat ka oras pauli sa iya pamilya para makaupod sila kag makabulig sa pagpalubong. Pero ginpangamuyuan nila ini nga mag-asawa kag nagdesisyon sila nga imbes nga magbiyahe pauli sa Guayaquil, mas maayo kon maggamit na lang sila sang videoconference para makaupod gihapon nila ang ila mga paryente. Si Sister Moncada nagsiling: “Kon nagpuli kami, posible gid nga malatnan kami kag malatnan man namon ang iban.”

Natural lang nga nakasiling si Sister Moncada nga nabatyagan niya ang grabe nga “kasakit kag kabalaka,” pero ginpadayon nila nga mag-asawa ang ila hilikuton sa pagsimba kag “wala nag-untat sa pagpangamuyo kay Jehova kag sa pagpangayo sang iya giya.” Padayon sila nga naghanda para sa Memoryal sang kamatayon ni Jesus paagi sa pag-agda sa ila mga Bible study kag pagbasa sang mga teksto parte sa katapusan nga mga adlaw ni Jesus sa duta. Nagapakigbahin man sila sa ministeryo paagi sa letter writing kag nagatambong sa mga miting sang ila kongregasyon paagi sa videoconference. Siam sa indi Saksi nga mga paryente ni Sister Moncada ang nagtan-aw sang Memoryal sa Spanish.

“Napalig-on gid kami kay may mga Bible study kami nga nanikasog gid nga makatan-aw sang Memoryal, bisan mabudlay ini para sa ila,” siling ni Sister Moncada. Nagdugang pa sia: “Nasorpresa man ako kag nalipay nga makita ang akon mga pamilya sa iban nga pungsod nga naka-tie in man.”

Nagsiling pa gid si Sister Moncada: “Natun-an ko sa sini nga eksperiensia nga bisan ano nga kasakit ang aton ginaatubang, ang padayon nga pag-alagad kay Jehova amo ang pinakamaayo nga paagi para mapahaganhagan ang aton ginabatyag, kay ginapakamaayo ni Jehova ang aton mga panikasog nga maalagad sia.”

Ang aton mga kauturan sa bilog nga kalibutan nagabuylog sa kalisod sang mga napatyan sang pinalangga sa sining tion sang pandemic, kag padayon naton sila nga ginaupod sa aton mga pangamuyo. Ginahulat naton ang pag-abot sang tion nga dulaon ni Jehova ang tanan nga kabangdanan sang kasakit, pareho sang mga balatian, kag banhawon niya ang tanan niya nga matutom nga alagad nga napatay.—1 Corinto 15:21, 22.