Sugod sang Enero 1, 2024, opisyal na nga ginbuksan ang Patterson Visitor Center, sa Watchtower Educational Center sa Patterson, New York, U.S.A. Ang pinasahi nga bahin sang visitors’ center amo ang museum nga Bible village nga nagapakita sang pagkabuhi sang panahon ni Jesus sang una. Si Brother Isaiah Miller, nga nagaobra sa Museum Department sa Bethel, nagsiling: “Gindesinyo ang Bible village para buligan ang mga tawo nga makita kag matun-an kon paano nagkabuhi ang mga tawo sang panahon ni Jesus. Ginapakita sang mga surbe nga ang interactive nga paagi sang pagtuon makabulig gid sa tanan nga tawo bisan ano man ang ila edad.” Pagkatapos sang iya tour, ang isa ka bisita nagsiling: “Bangod sini nga museum, pamatyag ko nagbalik ako sa panahon sang Israel sang una. Kanami gid sini!”

Ini nga bahin sang museum nagabulig sa mga tawo nga mabal-an ang parte sa mga sapat, pagkaon, mga tanom, kag ang adlaw-adlaw nga ginahimo sang nagaistar sa baryo sa Israel sang unang siglo. Halimbawa ang mga kahoy nga olibo nga makita sa museum ginhurma halin sa molde nga ginhimo paagi sa mga kamot. Ini nga mga molde ginsunod sa mga kahoy nga olibo sa Israel. Ang mga nagabisita puede makagaling sang uyas sa galingan nga bato nga pareho gid kadaku sa gingamit sa Israel sang una. Makasakay man sila sa sakayan nga ginagamit sa pagpangisda pareho sa gingamit ni Jesus kag sang iya mga disipulo. Malipayon nga nagsiling ang isa ka brother: “Pamatyag ko daw ara ako sa rekord sang Biblia diin nagsiling si Jesus sa dagat: ‘Hipos! Maglinong ka!’” (Marcos 4:39) Samtang gina-tour sang mga bisita ang replica sang sinagoga sang una, maimadyin nila ang ila kaugalingon nga nagapungko kag nagapamati sing maayo samtang ginabasa sing matunog ang Pulong sang Dios.

Ang isa pa ka pinasahi nga bahin sang museum amo nga puede maistorya ang mga kauturan nga naga-acting nga daw pareho sa mga Israelinhon kag makatuon kon paano sila nagkabuhi sang panahon ni Jesus. Makapartisipar ang mga bisita sa sarisari nga mga obra kag buluhaton nga ginahimo sang panahon ni Jesus. Ang pulo ka tuig nga si Marcos nagsiling, “Nanamian gid ’ko sang ginbuligan ko ang isa ka panday nga Israelinhon nga maghimo sang pulungkuan!” “Nanamian man ko ’to,” siling sang walo ka tuig nga si Rebecca. “Nanamian man ko maggaling sang trigo para maghimo sang harina.”

Luwas sa museum, ang visitors’ center may ara man sang tatlo ka seksion. Ang “First-Century Bible Coins” nga exhibit naga-display sang orihinal nga mga sensilyo sang unang siglo, lakip ang malaka makita nga tetradrakma. Ang “All Your Sons Will Be Taught by Jehovah” nga museum nagabulig sa mga bisita nga mabal-an ang sarisari nga mga eskwelahan sa organisasyon ni Jehova kag nagapakita sang mga benepisyo kon ginatudluan ni Jehova. Ang “Defending and Legally Establishing the Good News” nagasugid parte sa halimbawa sang matutom nga mga kauturan sa pila ka lugar nga nakaeksperiensia sang paghingabot kag nagapakita kon paano nag-unong kag nagsuporta ang organisasyon ni Jehova sa ila.

Ang mga kauturan sa bilog nga kalibutan ginaimbitar nga magkadto kag mag-tour sa Patterson Visitor Center. Ini nga eksperiensia makapabakod sang ila pagtuo. Isa ka regalo halin kay Jehova. Isa pa gid ini ka paagi nga mapabatyag ni Jehova nga palangga kag ginapabaloran gid niya ang iya katawhan.—Santiago 1:17.