Sang Biernes, Agosto 18, 2023, gin-release ni Brother José Luis Peña, miembro sang Branch Committee sang Central America, ang Bag-ong Kalibutan nga Badbad Sang Cristianong Griegong Kasulatan sa Kekchi nga lenguahe. Ginpahibalo ini nga pag-release sa una nga adlaw sang “Mangin Mapinasensiahon”! nga Rehiyonal nga Kombension nga ginhiwat sa San Juan Chamelco, Alta Verapaz, Guatemala. May 590 nga nag-attend sa sini nga programa kag nakabaton sila sang naimprinta nga kopya sining bag-o nga translation. Puede naman ma-download ang digital kag audio nga pormat sini nga Biblia. Ang Kekchi ginahambal sang sobra 1,300,000 ka tawo sa Belize kag Guatemala. Subong, mga 520 ka manugbantala nga nagahambal sang Kekchi ang nagaalagad sa 17 ka kongregasyon kag 4 ka group sa duha ka pungsod.

Ang pila ka kauturan nagkomento kon paano ini nga translation sang Cristianong Griegong Kasulatan makabulig sa mga nagahambal sang Kekchi nga maintiendihan pa gid sing insakto ang Pulong ni Jehova. Naghatag sang halimbawa ang isa ka sister: “Sa 1 Timoteo 1:11, nagsiling ang Bag-ong Kalibutan nga Badbad nga si Jehova ‘malipayon nga Dios.’ Pero, sa iban nga translation sang Biblia sa Kekchi, wala ginpakita nga may amo sini nga personalidad si Jehova. Subong, magamit ko ini nga bersikulo para pahanumdumon ang mga tawo nga ang pagkilala kay Jehova makahatag sa aton sang kalipay bisan pa sa mabudlay nga mga tion.”

Nagasalig kita nga ining bag-o nga translation makabulig sa madamo nga sinsero nga mga tawo nga nagahambal sang Kekchi nga kilalahon kag higugmaon si Jehova kag pabaloran ang iya Pulong.—Hulubaton 7:1, 2.