Sang Hulyo 13, 2021, ang European Court of Human Rights (ECHR) nagdesisyon pabor kay Brother Rostom Aslanian sa isa ka kaso batok sa mga pungsod sang Moldova kag Russia. Gin-apelar ni Brother Aslanian ang sentensia sa iya sang mga awtoridad sa Transnistria (Pridnestrovskaia Moldavskaia Republic). Ginsentensiahan sia nga mapriso kay nagpangindi sia nga magsoldado bangod sa iya konsiensia. Ang iya pagdaug sa sini nga kaso mangin sulundan sang mga kaso parte sa kinamatarong sa kahilwayan sang relihion sa Transnistria.

Ang Transnistria, ginakilala sa bilog nga kalibutan nga sakop sang Moldova, pero ang pungsod sang Russia nadalahig man sa pagdumala sang kahimusan parte sa seguridad sini nga lugar. Ining duha ka pungsod pareho nga miembro sang European Convention on Human Rights amo nga dapat nila respetuhon ang kahilwayan sang konsiensia sang mga tawo.

Sang 2010, ginpatawag si Brother Aslanian para magsoldado. Pero nagpangabay sia nga maghimo sing alternative service bangod sang iya mga pagpati base sa Biblia. Sang Marso 29, 2011, ginbasura ang iya pangabay. Ginsentensiahan sia nga guilty kag ginpriso sing isa ka tuig. Natapos ni Brother Aslanian ang sentensia sa iya, pero sang ulihi, ang iya kaso ginpasaka sa European Court of Human Rights.

Sa desisyon sang ECHR, ginsambit sini ang nauna na nga mga desisyon sang korte. Ginapakita sa sini nga mga desisyon nga wala sing legal nga basihan para prisuhon si Brother Aslanian kay nagpangindi sia nga magsoldado bangod sa iya konsiensia. Nakita sang Korte nga ginakontrol sang Russia ang mga soldado, ekonomiya, kag pulitika sang Transnistria. Gani dapat nga Russia ang manabat, kag indi ang Moldova, sa tanan nga natabo. Suno sa ECHR, ginlapas sang mga awtoridad ang kahilwayan sa relihion ni Brother Aslanian sang ginsentensiahan sia nga mapriso sing isa ka tuig, bangod sa akusasyon nga “indi pagtuman sa mando nga magsoldado.” Ginmanduan sang Korte ang Russia nga bayaran sia sing danyos para sa isa ka tuig nga pagtener niya sa prisuhan.

Nalipay kita sa pagdaug sini nga kaso. Mangin proteksion ini para sa aton mga kauturan sa Transnistria. Sa liwat, nabatyagan naton ang mainunungon nga gugma kag pagpalangga ni Jehova sa iya mga katawhan nga ara sa kabudlayan.—Salmo 18:25.