Sang Abril 25, 2022, ang gin-update nga version sang Giya sa Pagtuon Para sa mga Saksi ni Jehova gin-release sa JW Library nga app. Mas madamo na ini subong sang unod nga reperensia nga nagapaathag sang mga teksto.

Sugod sang gin-release ini sang 2013, ang Giya sa Pagtuon nagaunod na sang indese sa kasulatan nga may mga reperensia halin sa pinakabag-o nga mga publikasyon.

Sang nagligad nga tinuig, madamo nga daan nga publikasyon ang ginbutang sa JW Library. Ang kalabanan nga publikasyon nga ara sa Watchtower ONLINE LIBRARY (WOL) makita na sa app. Sa gin-update nga Giya sa Pagtuon ginbutang man ang mga reperensia halin sa sining daan nga mga publikasyon. Sa English, ginbutang pa gid sa Research Guide ang mga reperensia halin sa Insight on the Scriptures. Dugang pa, ang tanan nga reperensia halin sa Giya sa Pagtuon ginbutang na sa JW Library, amo nga mabuksan mo ini bisan indi ka konektado sa Internet.

Ang update nagaunod man sang mga reperensia halin sa mga leksion sa Magkabuhi sing Wala Katapusan! nga libro. Ang sister nga si Kari nagsiling: “Nakulbaan ako magpanaksi paagi sa telepono, pero nabal-an ko nga kinahanglan gid sang mga tawo ang paumpaw. Kon kaisa may madumduman ako nga teksto, pero kinahanglan ko ang bulig kon paano ini ipresentar sa simple pero makagalanyat nga paagi para mapadayon ko ang pag-istoryahanay. Kanami kay subong, puede ko na buksan ang madumduman ko nga teksto kag makita ko na dayon ang mga reperensia sa Giya sa Pagtuon, pati na ang halin sa mga leksion sa Magkabuhi sing Wala Katapusan! Bangod sini, mas nagdugang ang akon kompiansa kag kalipay sa ministeryo.”

Ginpasimple ang paagi sa paghimo sang Giya sa Pagtuon para mangin available ini sa mas madamo pa nga lenguahe. Si Ivo, nga nagaalagad sa branch sa Chile, nagsiling: “Amo ini ang una nga tion nga ginhimo ang Giya sa Pagtuon sa Mapudungun. Wala pa ako kaagi bulig sa paghimo sini nga klase sang publikasyon, pero simple gid ang paagi sa paghimo sini. Nakibot ang mga kauturan nga may amo sini nga publikasyon sa amon lenguahe. Wala sila magpensar nga himuan sini ang isa ka gamay nga lenguahe. Nalipay gid sila kay makabulig ini sa ila personal nga pagtuon kag paghanda sang mga komento kag mga pamulongpulong.”

• Sa Biblia, pangitaa ang bersikulo nga gusto mo i-research.

• I-tap ang numero sang bersikulo. Sa pop-up context menu, pinduta ang icon sang Giya sa Pagtuon. Kon wala ka sang makita nga icon sa context menu, buot silingon nga wala sang reperensia halin sa Giya sa Pagtuon nga nagapaathag sina nga bersikulo.

Ginauna sa listahan sang Giya sa Pagtuon ang pinakabag-o nga reperensia. Kon gusto mo tan-awon ang mas daan nga reperensia, i-scroll down mo ang listahan sang mga reperensia sa study pane. Sa mga bersikulo nga gin-athag ang aton paghangop sang nagligad nga tinuig, ara sa pinakabag-o nga mga reperensia ang paathag parte sa aton bag-o nga paghangop.