Sang Abril 25, 2020, ginpahibalo ni Brother Mark Sanderson, miembro sang Nagadumala nga Hubon, paagi sa narekord nga video, ang pagpagua sang ginrebisar nga Bag-ong Kalibutan nga Badbad sang Balaan nga Kasulatan sa Croatian kag Serbian nga mga lenguahe. Ang Serbian nga translation ginpagua sa Roman kag Cyrillic nga alphabet.

Bilang pagsunod sa sugo sang gobierno sa sining panahon sang coronavirus nga pandemic, ang mga kongregasyon sa Bosnia and Herzegovina, Croatia, Montenegro, kag Serbia wala nagtipon para sa sini nga okasyon. Gani ini nga special meeting ginhiwat paagi sa videoconference kag may total nga 12,705 ang nagtan-aw.

Para sa isa sa aton kauturan nga nagtan-aw sang programa, ang ginrebisar nga Biblia isa ka “tunay nga hiyas,” kag nagsiling sia nga nabatyagan niya nga “daw pareho lang nga ginaistorya ako ni Jehova.” Ang isa pa ka brother nga nagaalagad bilang gulang sa kongregasyon, nagsiling: “Samtang ginabasa ko ining bag-o ginrebisar nga translation sang Biblia sa akon namat-an nga lenguahe, mas nabatyagan ko nga palangga ako ni Jehova kag ginaatipan niya ako. Kag bilang manugbantay sa kongregasyon, mas mapabatyag ko na sa mga kauturan nga importante sila kay Jehova kag palangga niya sila.”

Ang pag-translate sini nga mga Biblia nagsugod sang 1996. Wala pa tatlo ka tuig, sang Hulyo 1999, ang Bag-ong Kalibutan nga Badbad Sang Cristianong Griegong Kasulatan ginpagua sa Croatian kag Serbian. Pagligad pa gid sang pito ka tuig, sang 2006, ang kompleto nga Bag-ong Kalibutan nga Badbad sang Balaan nga Kasulatan ginpagua sa sini nga mga lenguahe.

Nagasalig kita nga ining sibu kag mahapos maintiendihan nga ginrebisar nga mga edisyon sang Bag-ong Kalibutan nga Badbad sa Serbian kag Croatian padayon nga magabulig sa tanan nga magabasa sini nga makita nga “ang pulong sang Dios buhi.”—Hebreo 4:12.