Sa una nga semana sang Agosto 2024, ang isa ka mabaskog nga bagyo naporma sa Atlantic Ocean. Nagbaskog ini kag nangin Hurricane Debby. Dayon sang Agosto 5, 2024, ining Category 1 nga hurricane nag-landfall malapit sa Steinhatchee, Florida, U.S.A. Ang hangin sini may kabaskugon nga 130 ka kilometro kada oras. Dugang pa, indi magnubo sa dose ka buhawi ang dala sang bagyo. Bangod sa mabaskog nga hangin kag mabunok nga ulan, linibo ang nadulaan sang kuryente. Indi magnubo sa walo ka tawo ang napatay sa United States.

Halin didto, naghaganhagan ang kabaskugon sang bagyo nga Debby kag mahinay ini nga nagpa-north pakadto sa Canada. Sang Biernes, Agosto 9, 2024, nagbubo ang mabaskog nga ulan sa probinsia sang Canada nga Quebec. Wala pa mag-24 ka oras, mga 22 ka sentimetro na nga ulan ang nagtupa. Bangod sini, madamo nga balay ang nabahaan, madamo nga mga bilding, taytay, kag dalan ang naguba, kag ginatos ang nagbakwit sa mas safe nga mga lugar. Sa Canada, gin-report nga isa ka tawo ang napatay.

United States

• Wala sang utod nga napatay

• 1 ka manugbantala ang naospital

• 23 ka manugbantala ang nagbakwit

• 7 ka balay ang may daku nga guba

• 60 ka balay ang may gamay nga guba

• 1 ka Kingdom Hall ang may gamay nga guba

Canada

• Wala sang utod nga napatay. Pero, masubo gid nga may isa ka Bible study nga napatay bangod sa landslide

• 1 ka manugbantala ang nasamaran

• 23 ka manugbantala ang nagbakwit, pero ang kalabanan sa ila nakabalik na sa ila mga balay

• 2 ka balay ang may daku nga guba

• 165 ka balay ang may gamay nga guba

• Wala sang Kingdom Hall nga naguba ukon nawasak

• Ang mga manugtatap sang sirkito kag ang mga gulang sa United States kag Canada nagahatag sang paumpaw halin sa Biblia kag sang praktikal nga bulig sa mga kauturan nga nagaistar sa apektado nga mga lugar

• Sa Canada, may gin-asayn na nga Disaster Relief Committee kag nagahatag sang bulig nga kinahanglan

Padayon kita nga nagapangamuyo para sa mga naapektuhan sining mabaskog nga bagyo. Napaumpawan man kita kay nabal-an naton nga si Jehova amo gid pirme ang ‘aton kaluwasan sa tion sang kalisdanan.’—Isaias 33:2.