Sang alas 5:00 sang aga gintawgan sang isa ka elder sa kongregasyon si Brother Femi Durodola kag ang iya nga asawa nga si Yana. “Nagsiling ang elder: ‘Indi kamo magkabalaka, himos lang kamo kay lapit na sa Kyiv ang mga soldado sang Russia!’” siling ni Yana. “Pagkabati ko sang iya ginhambal grabe gid ang akon nerbios.”

Ining mag-asawa nga bag-o lang nakasal naghimos kag nag-ilis gilayon. Dayon, nangape sila. Amo ato ang katapusan nga kape nga ila gin-inom sa ila kaugalingon nga balay. Ginbasa man nila ang daily text. Ini nagasiling: “Mangin mabakod kamo kon magpakalinong kamo kag magsalig sa akon.” (Isaias 30:15) Si Femi nangamuyo sing hugot kay Jehova. Dayon si Femi nga halin sa Nigeria kag ang iya asawa nga si Yana nga citizen sang Ukraine, naglakat nga go bag lang ang bitbit para malagyo sa Netherlands. Ginbiyaan nila ang tanan.

Halos pareho sini ang naeksperiensiahan sang aton mga kauturan nga nagdesisyon nga malagyo sa Ukraine sa tapos nga gin-atake sang Russia ang Ukraine sang Pebrero 24, 2022. Mga 130,000 ang mga Saksi ni Jehova sa Ukraine. Subong, sobra na 36,000 ka Saksi ang nagdesisyon nga magbakwit sa ila mga puluy-an kag mga 16,000 ang nagpalagyo pakadto sa iban nga pungsod. Ginbiyaan sang madamo sa ila ang ila mga balay, obra, kag mga kongregasyon. Sa sini nga inaway ang mga lalaki nga citizen sang Ukraine nga nagaedad sing 18 asta 60 indi puede magbiya sa pungsod. Pero, ang mga lalaki nga indi citizen sang Ukraine puede makabiya sa pungsod.

Pila lang ka butang ang puede dal-on sang mga nagapalagyo. Grabe kabudlay sang ila biyahe sa mga tren kag mga bus pakadto sa mas safe nga mga lugar. Pero kon kis-a wala sila kabalo kon diin sila makalab-ot. Ang ila mabakod nga pagtuo kay Jehova amo ang naghatag sa ila sing kusog para biyaan ang siudad nga ginguba sang inaway. Kag indi sila sigurado kon bala makabalik pa sila.

“Ginbiyaan namon ang tanan. Diutay lang amon nga dala,” siling ni Yana. “Ang amon sitwasyon nagpahanumdom sa amon nga wala na sing mas importante pa sangsa amon relasyon kay Jehova.”

Mabatian ang uwang sang mga sirena kag ang linupok sang mga bomba malapit sa balay ni sister Lilia Antoniuk. Nagalinapta lang sa dalan ang nasunog nga mga salakyan kag madamo nga bilding kag mga taytay ang nagkalaguba.

Si Lilia kag ang ila 17 anyos nga bata nga si Oleksandra, nagdesisyon nga magbiya sa Ukraine. Pila ka adlaw sila nga nagsakay sa gutok nga tren pakadto sa Poland. Diutay lang ang ila dala nga pagkaon kag kinahanglan nila nga magtindog sing inoras. Naghaganhagan lang ang ila nga kabalaka sang nakalab-ot sila sa Przemyśl, Poland.

“Sang nakita namon ang mga brother nga may ‘JW.ORG’ nga mga sign, sigurado kami nga indi nila kami pagpabay-an,” siling ni Lilia. Gindala sila sa isa ka Kingdom Hall para mangin komportable sila, makakaon, kag makapahuway. Dayon gindala sila sa balay nga ila dayunan.

“Nabatyagan gid namon nga gin-atipan kami ni Jehova kag nagpabakod pa gid ini sang amon pagtuo,” siling ni Lilia, nga subong nakasaylo na sa Germany. “Nagapasalamat gid ako sa pagpalangga ni Jehova kag sa mga kauturan nga nagbulig sa amon sa sining mabudlay gid nga tion.”

Ginsugid ni Sister Anastasiia Kovalyova kon paano gin-atake sang mga soldado ang siudad sang Zaporizhzhia paagi sa pagpamomba. Makita niya ang igrab sang mga missile kag mabatian niya ang mga sinigabong sa iya nga apartment. Ining wala untat nga linukpanay nagpanerbios gid sa mga hinablos ni Anastasiia nga nagaedad sing pito kag tatlo ka tuig. Gani nagdesisyon ang ila pamilya nga maghalin. “Diutay lang ang amon nga nadala, gani wala kami sing dala nga bayo kag iban pa nga mga kinahanglan namon,” siling ni Anastasiia. “Pero gin-atipan gid kami sang mga kauturan kag ginhatagan sang amon mga kinahanglanon kag sobrasobra pa ini.” Si Anastasiia, kag ang iya bayaw nga si Anya, upod ang mga bata nag-agi sa Poland pakadto sa Germany.

Si Sister Shchukina kag ang iya nga nanay, nga si Sister Olha Lysenko, nagapanago sa matugnaw nga basement sa ila gamay nga balay sa kada mabatian nila ang sirena nga nagapaandam nga may nagapamomba. Ini nga mga sister nagapayunir sa isa ka gamay nga banwa sang Brailiv, Vinnytsia Oblast bangod nagakinahanglan diri sang dugang nga manugbantala. Ginbudlayan sila sa pagdesisyon kon bala magahalin sila ukon indi, pero nagdesisyon sila nga maghalin sang delikado na katama ang sitwasyon. Gindala lang nila ang ila mga kinahanglanon kag nagsakay sila sa tren sing duha ka adlaw nga wala halos tulog. Indi mahapos para kay Olha ini nga pagbiyahe kay 58 anyos na sia kag may mga ginabatyag sia sa iya lawas. Nag-abot sila sa Rzeszów, Poland, sang alas 2:00 sang kaagahon. Pero may mga kauturan nga nagahulat sa ila. “Bisan pa kaagahon na kami nag-abot ginhulat gid kami sang mga kauturan,” siling ni Anastasiia. “Daku gid ang amon nga pasalamat kay Jehova kag sa mga kauturan.”

Sa siudad sang Sumy, si Brother Andrzej Chyba nga isa ka Polish citizen kag ang iya nga asawa nga si Elizabeth, nga halin sa Britain nagpanago sa basement sa balay sang isa ka brother kag may lima pa sila ka iban nga upod. Mabatian niya nga may nagalinupad nga mga fighter jet, pati man ang mga linupok sang mga pusil, kag ang pagsinigabong sang mga bomba. Naglantaw sila sang Bible drama nga O Jehova, . . . sa Imo Nagasalig Ako, nga istorya parte kay Hari Ezequias sang salakayon na sang mga Asirianhon ang Jerusalem. Nagpabakod gid ini sa ila.

“Ginasendan man kami sang mga kauturan sang mga punto halin sa Biblia. Halimbawa ginpalig-on nila kami nga basahon ang Salmo 27,” siling ni Andrzej, nga ara na subong sa Poland upod ang iya asawa.

Nagasalig kita nga pakamaayuhon ni Jehova ang aton mga kauturan nga ‘nagbiya sang tanan nga butang’ samtang ginahulat nila ang palaabuton nga wala na sing inaway.—Filipos 3:8.