Ang pinakauna nga face-to-face nga rehiyonal nga mga kombension sa Jamaican Creole kag Pennsylvania German nga mga lenguahe ginhiwat sang Hulyo 2023. Sa kabilugan, halos 2,000 ang nag-attend sa “Mangin Mapinasensiahon”! nga Rehiyonal nga Kombension nga madugay na ginapaabot nga hiwaton sa ila nitibo nga mga lenguahe.

Sa Jamaica, ang opisyal nga lenguahe amo ang English. Pero, ang kalabanan sa mga nagaistar sa isla nagahambal man sang Jamaican Creole. Ang pila sa 1,700 ka tawo nga nag-attend sa kombension naghalin sa United Kingdom kag United States. Ang programa ginhiwat sa Marlie Technology Park sa Old Harbour, Jamaica, halin sang Hulyo 14 asta 16, 2023. May dose nga nabawtismuhan.

Nalipay gid ang aton mga kauturan nga nagahambal sang Jamaican Creole nga naka-attend sila sa kombension sa ila nitibo nga lenguahe sa una nga tion. Si Sister Tenesha Gordon nagsiling: “Sang nagsugod ang programa kag sang gintamyaw sang brother sa stage ang mga nag-attend sa Jamaican Creole, nagtulo ang mga luha ko. Daw indi ako makapati sa akon nabatian. Indi ko ini gusto matapos!”

Mga 400,000 ka tawo sa Canada kag United States ang nagahambal sang Pennsylvania German. Ang German nga dialect ginahambal ilabi na sa uma nga mga lugar sang Amish kag Mennonite nga mga komunidad. Ang mga kauturan halin sa lima ka kongregasyon kag isa ka group nga nagahambal sang Pennsylvania German nagbiyahe halin sa pila ka state para mag-attend sa kombension. Sobra 200 ang nag-attend sa programa sa Coraopolis Assembly Hall sa Pittsburgh, Pennsylvania, U.S.A., halin sang Hulyo 7 asta 9, 2023.

Si Brother David Miller nagdaku nga nagahambal sang Pennsylvania German. Nag-Bible study sia upod sa mga Saksi ni Jehova sobra 25 ka tuig na ang nagligad sa English. Sina nga tion, wala gid sia nagpensar nga may maporma nga mga kongregasyon nga nagahambal sang Pennsylvania German, ilabi na sang isa ka kombension sa iya nitibo nga lenguahe. Nagsiling sia: “Kanami gid sini! Nakapokus gid ako sa programa. Bangod ginhiwat ini sa akon lenguahe, natandog gid ang akon tagipusuon sa nabatian ko nga instruksion.”

Nagakalipay gid kita upod sa aton mga kauturan nga nag-attend sa sining makasaysayan nga mga kombension. Nagapasalamat kita kay Jehova, nga naghiusa sa aton kag nagpaposible nga mabaton sang tanan ang putli nga lenguahe.—Sofonias 3:9.