Minilyon ka mga Saksi ni Jehova ang apektado sang novel coronavirus (COVID-19) nga pandemic. Ginatuman gid nila ang sugo sang lokal nga awtoridad pero padayon man sila nga nagasimba kay Jehova. Sa mga lugar nga apektado gid sang virus, ang aton mga kauturan nagagamit sang bag-o nga mga pamaagi para mapadayon ang ila ministeryo.

Ang isa ka brother sa Pisa, Italy, nagsiling: “Kanami gid sang resulta sining bag-o nga pamaagi! Madamo sang tawo nga ara lang sa ila balay, gani gintan-aw namon sang akon asawa ang mga contact sa amon telepono kag gin-iskedyul namon nga mag-videoconference sa ila. Madamo kami sang nakita nga mga Bible study kag return visit, ang iban sini sa ila naistorya na namon sang una kag ang iban bag-o lang namon naistorya. Bangod sini, madamo ang amon oras nga nagamit sa ministeryo kag madamo kami sing naistorya nga mga tawo.”

Sa South Korea, mas ginagamit na subong sang mga kauturan ang mga feature sang aton jw.org nga website kag sang JW Library. Halimbawa, may isa ka brother nga nakabaton sang text halin sa iya Bible study nga tatlo ka tuig na nga nag-untat sa iya pagtuon. Ang iya Bible study nagsiling nga bangod sang pandemic, napamensaran niya sing maayo ang parte sa tanda sang katapusan nga mga adlaw. Gingamit sang brother ang “Share Link” nga feature sang JW Library app para padal-an ang iya Bible study sadto sang mga impormasyon parte sa katapusan nga mga adlaw paagi sa text. Ang brother nagsiling nga “makapalig-on gid nga makita nga madamo ang gusto magtuon parte sa Dios kag sa Biblia bangod sining ebidensia sang tanda sang katapusan nga mga adlaw.”

Ang madamo nga report nga ginapadala sang aton mga kauturan sa mga branch sa bilog nga kalibutan nagapamatuod nga ginapabaloran gid nila ang ila ministeryo. Nalipay gid kita nga makita kon paano nila ginagamit ang praktikal nga kaalam para padayon sila nga makabantala sang maayong balita.—Miqueas 6:9.