Sang 2020 nga tuig sang pag-alagad, may ginhimo nga mga pagbulig ang aton organisasyon sa mga naapektuhan sang kalamidad sa bilog nga kalibutan. Amo ini ang pinakadaku nga proyekto sang pagbulig nga nahimo sang aton organisasyon halin sang una, kag wala pa ini natapos. Sobra 950 ka Disaster Relief Committee (DRC) ang gin-organisar sa bilog nga kalibutan. Magluwas sa pandemic, madamo pa nga trahedya kag mga kalamidad ang natabo sang 2020. Indi gid mahapos para sa mga DRC nga magbulig sa mga kauturan. Kay man, kinahanglan nila sundon ang mga protocol nga ginapatuman bangod sa COVID-19. Pero para sa mga kauturan nga nagbulig sa sini nga proyekto, ini nga pagbulig nagpabakod pa gid sang ila pagtuo. Ari ang pila sa mga hitabo nga naeksperiensiahan sang aton mga kauturan:

Sang 2020 nga tuig sang pag-alagad, 126 ka bagyo ang naeksperiensiahan sang aton mga kauturan. Mga 11.5 porsiento ini nga mas madamo kon ikumparar sa 2019 nga tuig sang pag-alagad. Bangod sa sini nga mga bagyo, madamo ang naapektuhan sang pagbaha kag landslide.

Halimbawa, madamo nga bagyo ang nag-igo sa Pilipinas, gani madamo nga kauturan ang nagbakwit.

Naapektuhan sang mabaskog nga pag-ulan ang Nigeria, kag nahalitan sini ang mga pananom sang aton mga kauturan.

Daku gid ang halit sang malawig katama nga tingulan sa South Korea.

Madamo nga pungsod ang nahalitan sang wildfire. Suno sa report, ang pila sa sini nga mga wildfire, amo ang pinakamalapad nga sunog sa kasaysayan.

Halimbawa, naapektuhan gid ang pila naton ka kauturan sang nasunog ang indi magnubo sa 400,000 ka ektarya nga kadutaan.

Amo ini ang natabo sa United States.

Naapektuhan man sang mga wildfire ang aton mga kauturan sa Australia.

Pagkatapos sini nga mga kalamidad, naghimo dayon ang aton organisasyon sang mga safety guideline para masigurado nga ang mga magaboluntaryo sa pagbulig kag ang mga kauturan nga magabaton sing bulig mangin safe pirme.

Gin-istorya ni Brother Han Chan-hee, nga nagbulig sa DRC sa South Korea, ang ila ginhimo para maproteksionan ang mga kauturan: “Kada aga, gina-check namon ang temperature sang kada isa. Ginasigurado man namon nga may ara pirme physical distancing. Ginalimitehan man namon ang kadamuon sang mga boluntaryo sa site, kag ginalikawan namon nga mag-updanay kaon ukon magtinumpok kon break time. Magluwas sina, gina-disinfect man sang mga nagaboluntaryo ang ila mga gamit antes kag pagkatapos sang pagbulig.”

Bangod sini nga mga kalamidad, ang pila sa aton mga kauturan nagbakwit ukon nadulaan gid sang puluy-an. Si Brother Chris Shirah nga taga-United States, nga nagbulig man sa DRC bangod sa wildfire sa California, nagsiling: “Para masunod ang mga protocol nga ginapatuman bangod sa COVID-19, ginamonitor namon ang kadamuon sang mga kauturan nga ginapadayon namon sa iban nga balay.”

Sa madamo nga lugar, may ginapatuman nga mga restriksion sa pagbiyahe kag iban pa nga safety protocol. Bangod sini, diutay lang ang puede makaboluntaryo sa pagbulig. Si Brother Philips Akinduro, nga nagtrabaho sa DRC sa Nigeria, nagsiling: “Ginbudlayan gid kami kay gin-estriktuhan [sang gobierno] ang pagbiyahe. Bangod sini, diutay lang gid ang puede makaboluntaryo.”

Si Brother Kim Joon-hyeong, nagtrabaho man sa DRC sa South Korea. Ginsugid niya ang panimuot sang mga nagboluntaryo sa pagbulig. Nagsiling sia: “Ginahimo namon ini bangod palangga namon ang Dios kag ang aton mga kauturan. Gani ginatinguhaan gid namon nga mangin safe para maproteksionan ang kabuhi sang tanan. Medyo hangkat ini sa amon tanan, pero paagi sa sini nakapadayon kami sa pagbulig kag nabatyagan gid namon ang kalipay.”

Bisan pa sang mga hangkat nga ila naeksperiensiahan, napadayon sang mga boluntaryo ang pagbulig sa mga kauturan. Nakabulig ini sa ila nga magbakod pa gid ang ila pagtuo kag pagsalig kay Jehova.

Halimbawa, nagapalibog si Brother Han kon bala makakita dayon ang DRC sang mga boluntaryo para sa himuon nga pagbulig kay kinahanglan na nila sugdan ang pagbulig pagkasunod nga adlaw. “Sa pila pa lang ka oras, narealisar ko nga wala gali ako sing dapat kabalak-an. Ginatos ka kauturan ang nagboluntaryo halin sa bilog nga pungsod. Ang iban gani sa ila ginbalibaran na lang namon bangod sobra na ini kadamo.” Nagsiling pa sia: “Napalig-on gid ako kay nabatyagan ko nga ginabuligan gid kami ni Jehova.”

Ginsugid man ni Brother Brad Benner ang iya ginbatyag sa tapos sang ila pagbulig sa naapektuhan sang bagyo. Nagsiling sia: “Kabudlay gid sang amon sitwasyon, pero nabuligan namon gihapon ang nagbakwit nga mga kauturan. Nakabaton sila sing mga pagkaon, napangitaan sila sang dalayunan, kag napalig-on sila sa espirituwal. Naeksperiensiahan ko gid nga wala sing mga bagyo ukon pandemic nga makapugong para mapakita sang aton mga kauturan ang ila gugma sa isa kag isa.”

Si Brother Alquin Dayag, nga nagbulig sa DRC sa Pilipinas, nagsiling: “Bangod sa amon pagbulig, mas napamatud-an ko nga maalwan gid si Jehova. Ginahatagan niya kita sing kusog nga labaw sa kinaandan kag sing kaalam para mahimo naton ang aton asaynment.”—2 Corinto 4:7.

Ginapasalamatan gid namon ang pagpangabudlay sang tanan nga branch office, sang mga DRC, kag sang tanan nga kauturan nga nagbulig sa sini nga proyekto. Ang pagpangabudlay sining mahigugmaon nga mga boluntaryo kag ang mga donasyon nakabulig gid sa mga kauturan nga naapektuhan sang grabe nga mga kalamidad sini nga tuig.—1 Tesalonica 1:3.