Sang Marso 8, 2022, nabaton na sang Construction Project Committee (CPC) para sa Ramapo construction project ang isa ka importante nga permit halin sa Town of Tuxedo Planning Board. Bangod may permit na, nasugdan na ang pagpasangkad kag pag-adjust sang entrance sang propiedad sa Ramapo. Dugang pa, amat-amat na man nga ginakompleto sang mga kauturan ang mga requirement para sa final approval para masugdan ini nga proyekto. Ini nga site plan approval magahalin sa Town of Ramapo Planning Board. a

Si Brother Robert McRedmond, nga coordinator sang CPC, nagsiling: “Sa umpisa pa lang sini nga proyekto, nakita na namon nga kinahanglan gid nga kay-uhon ang dalan pasulod sini nga propiedad. Ang nabaton namon nga permit nagatugot na sa amon nga magkuha sang mga kontraktor para mag-adjust kag magpasangkad sini nga intersection, para mas safe nga maagyan ini sang mga salakyan. Ginaobra na ini subong sang mga kontraktor kag matapos sa sini nga tingadlaw. Ginaobra man sang mga boluntaryo ang pag-restore sang daan nga taytay nga bato sa sini nga dalan.”

Si Brother Gary Stradowski, nga nagaalagad man sa CPC, nagsiling: “Eksayted gid kami sang nabaton namon ini nga permit. Dali na lang naton mabaton ang opisyal nga site plan approval para sa bilog nga proyekto. Kon mahatag na sa aton ini nga permit, umpisahan na sang mga kontraktor ang pag-clearing kag paghanda sang site, mahimo sa katapusan sang 2022. Kon matabo ina, makabulig na ang mga boluntaryo sa site sa tungatunga sang 2023.”

Nalipay gid kita nga mahibaluan ini nga update kag nagapangamuyo kita nga padayon nga giyahan sang espiritu ni Jehova ini nga proyekto.—Zacarias 4:6.