Sang Oktubre 27, 2023, gin-aprobahan ang site plan para sa bag-o nga konstruksion sa pasilidad sang Bethel sa banwa sang Fishkill, New York, U.S.A. Bangod sini nga approval halin sa Town Planning Board, makasugod na dayon ang pag-obra sang bag-o nga Fishkill Support Center sang mga Saksi ni Jehova.

Ang mga pasilidad sang Fishkill Bethel mga 64 ka kilometro sa north sang World Headquarters sang mga Saksi ni Jehova sa Warwick, New York, U.S.A. Ang mga kauturan nga nagaalagad sa Fishkill nagaobra sa computer support, information technology, kag sa iban pa nga mga asaynment.

Ang bag-o nga konstruksion himuon sa 23 ka ektarya nga lote sa atubang sang dalayunan sang Bethel nga napatindog na nga daan. Ang support center may ara sang duha ka panalgan nga bilding sang opisina, nga may kalaparon nga 4,366 ka metro kuadrado, isa ka maintenance building nga may kalaparon nga 1,393 ka metro kuadrado, kag isa ka recreation building nga may kalaparon nga 1,393 ka metro kuadrado. Ginaplano man nga may ara lugar sa paglingawlingaw sa gua. Ginplano gid sing maayo ang pagdesinyo sang site para indi sini mahalitan ang palibot.

Samtang ang iban nga mga ulubrahon sa konstruksion himuon sang mga kompanya sa pagpatindog, dumalahan ini sang pila ka brother nga nagaalagad sa Bethel. Ini nga pasilidad ginapaabot nga matapos sa Oktubre 2025.

Si Brother Jason Kahle, nga nagaistar subong sa Fishkill kag nagaobra sa office support, nagsiling: “Asta subong, ang Fishkill Bethel ginagamit lang gid para istaran kag wala sing lugar nga matipunan sang mga nagaistar diri. Pero, bangod sining bag-o nga mga pasilidad makatipon na kami kag makatrabaho sing ululupod. Excited gid kami nga matapos ining bag-o nga support center!”

Nalipay gid kita sa pagpahibalo sining proyekto sa konstruksion nga makabulig sa mga nagaalagad sa Fishkill Bethel sa madamo nga paagi. Padayon kita nga nagapangamuyo upod sa ila sa pagpakamaayo ni Jehova sa sining makalilipay nga proyekto.—Salmo 127:1.